حوار من متى وفكرة الابتعاث برآسك و وش الضروف اللي مريت بها ؟؟ تعالو نفضفض

دخلت جو الصراحة !!
يالله عقبال م تتخرجين ي رب بالشهادة اللي ترفع الراس
بالتوفيق

ما شاء الله قصصكم ممتعة و فيها مقدار من العزيمة

يا رب ترجعوا بالشهادة اللي طالما حلمتوا فيها

طبعا مانا قايل قصتي لانها تفشل بالنسبة للقصص الباقي و كلها هياط و كلام فاضي -__-

لكن اللي اتفق معاكم فيه 100 % هو ان تجربة قبل السفر كانت من احلى ايام حياتي رغم اني واجهت صعوبات فيها

و الشي الثاني ان لولا الله ثم منتدى مبتعث كنت ما بعرف وش اسوي و غالبا بكون لسى ما سافرت

الله يديم هالمنتدى و يجازي اللي سواه و يوفق كل الاعضاء ان شاء الله. اتحدى فيه مبتعث ما دخله او ما استفاد منه

انا والله جت الفكرة براسي يوم كنت ادرس في سعود تحضيرية العام وكنت ناوي على هندسة والمعدل ماكان كويس بالنسبة للهندسة

فكرت اسحب ملفي من التحضيرية الترم الثاني وكلمت الوالد والوالدة اني كنت ابسحب ملفي الترم الثاني بعدين اقدم السنة اللي بعدها على الامام < كنت حاطها براسي

ومرة من المرارير كلمني خويي عن الابتعاث وتراها كويس وانت وش تبي بالجامعات اللي هنا ومن هالكلالم وقتها قلت صعععبة الاهل يوافقوا
وكذا وانا كنت اتقهوى مع الاهل جسيت نبضهم بالابتعاث واني ابروح علشان الجامعات هناك احسن واخذ لغة اقوى بعد
اول ماقلت هالكلام كانو مو موافقين يعني يسلكولي

وصرت ابثرهم كل مغربية اذا اجتمعنا عالقهوة وقولهم ميزات الابتعاث وهيك حتسي وكانهم اقتنعوا شوي وقالولي فكنا و شف انت اللي تحدد مستقبلك وشف انت وش تبي تبي تقدم السنة الجاية على الجامعات هنا ولا من الحين ضبط امورك بالسفرة برا <

واخوكم في الله ماصدق خبر وعلطول سنتر عند مبتعث والاخوان ما قصروا معنا هنا من اولى الخطوات الى الاآآن جزاهم الله خييير

وقدمت على الجامعات هنا على تقريبا شهر ١١ اللي راح والحمد لله حصلنا قبول في جورج ميسن وضبطة امور الفيزا


الفيزا ذي سالفة ثاااااانية واصصصصعب واصعب المراحل اللي مريت فيها الصراحة لانها طوووولت قعدة حول ٤شهووور
والاهل ضاغطين على كل يوم يكلموني لاتروح عليك الشهور ذي وانت ماسويت شي وقدم هنا عالجامعات هنا وكلام يجيب المغص الله لايعيدها من ايااام

واخيراً طلعت الفيزا وقته كن اتنكس من الفرحة ماني مصدق وعلطول بعدها كملت اجراءات السفرة


والحمد لله الان انا اكلمكم بعد ما انضميت للبعثة بعد مادرست لغة تقريباً شهرين .

هههه كل ماتذكر هذيك الايام اقعد اضحك واقول الحمد لله واتأمل في حكمة رب العالمين ..

انا سالفتي سالفه طويله صراحه .. بس انا وضعي يختلف شوي ...
قبل لا اتخرج من الثانوي كان عندي طموح إني اكمل طب .. بس بنفس الوقت حاط عندي خيارين .. اذا كانت نسبة الثانوي فوق التسعين .. راح اكمل طب .. واذا اقل راح اكمل في مجال الحاسب ..
وانا عندي رغبه جامحه بالتخصصين .. فالطب كان خاطري أني اتخصص طب .. اما الحاسب فكان هوايه عندي .. "عندي هواية بالالكترونيات تفكيك وتربيط "..

طبعا بعد التخرج كانت النسبه على غير المتوقع .. طاحت من تاسع دور ! .. ولكن الحمد لله .. فقلت خلاص راح اكمل في مجال الحاسب ..
وفعلا حاولت إني اكمل دراسه داخل السعوديه ... قعدت سنه ونص تقريبا او الظاهر سنتين الا .. بدون دراسه .. مانقبلت في شي ..
وكانت عندي الوالده اللي يحفظها في هذاك الوقت متشدده نوعا ما بسالفة البعد .. كانت تبيني حولها كوني انا بكرها .. او بالاصح معتمدين علي بالبيت بكل شي ..
الشاهد بالموضوع الوالده الله يحفظها تعودت على هذا الموضوع .. كانت تعتمد علي بكل شيء تقريبا .. فكان صعب عليها أني ابتعد عنها حتى لو كان فيها مستقبل وكانت تحرصني اني ادور شي قريب من حولها ادرس فيه ..
وانا احاول اقنعها بس ماهي راضيه تغير الفكره ... فكنت اقولها ابشري انتي بس أدعي الله وباذن الله الامور تزين ..
وفي خلال هالسنه والنصف .. كنت اقدم على الجامعات ومعاهد وكليات .. الخ مافيه شي ماقدمت عليه .. وبنفس الوقت كنت اشتغل في محل دعايه واعلان يعني امشي فيه اموري لحتى الاقي لي شي .. بعد سنه ونصف من التقديمات الغير نافعه .. وكنت حريص اني ادور قريب مني ولا قدمت شي برى .. مانقبلت باي شي .. مع العلم أن كان فيه اشخاص كانوا يطلبون مني اني اطلع معهم اقدم بالرياض وجده والجامعات البعيده "انا من سكان الخبر".. ولكن كنت ارفض وادعيلهم بان الله ييسر امورهم .. لاني مابي اسوي شي بدون رضا الوالده الله يحفظها ..
فجات الوالده الله يحفظها هذاك الوقت وكانت شوي مشحونه من معارفها بسبب أن عيالهم متوظفين واللي يدرس بعكسي انا .. وانا وقتها يعني مضغوط شوي من هالسالفه ..
فكانت تكلمني بنبرة صوت حسستني انا المذنب وكنت ساكت واحاول ما اغضب ربي .. وقعدت تضغط علي بالكلام لحتى عصبت ... فجأه ماحسيت بنفسي الا اني قلت لها "انتي اهتميتي بوجهك قدام الناس .. وماتدرين ان ولدك رفض كل التقاديم البعيده وهو عارف انه ماراح ينقبل قريب منك بس كله لاجل يرضيك .. ! وسكت انا وطلعت متنرفز .. ماني عارف اول مره اعصب بهالطريقه كان الشيطان فوق راسي .. الله يغفر لي ذنبي ..
اللي حصل بعد مارجعت لقيت امي تبكي .. ماهانت علي رحت وبوست راسها وهديتها وفي نفس الوقت تضايقت كثير ليش اني انا اللي بكيتها وانا اخطيت لما قلت لها هالكلام ..
فاللي حصل بعد ماهدت وراضيتها قالت لي " محمد قدم في كل الجامعات اللي بالسعوديه ودور رزقك .. وانا بادعي الله أنه يوفقك وويسر لك امرك .. ! " .. فقلت لها " لاتشيلين همي .. ماعليك مادام رب العباد معي .. فانا ماخاف شي .. بس انتي ادعي لي .. والامور تتيسر باذن الله ..!"..
والله يا اخوان بعد هذاك اليوم صحيح كانت الدنيا مقفله بوجهي .. لكن بعد هذاك اليوم باسبوع بس .. انقبلت بكلية الجبيل .. (الكليه اللي مقدم عليها ثلاث مرات ومختبر ثلاث مرات ونفس الاجوبه ماغيرتها ولا انقبلت فيها) ..
ولما دخلت كلية الجبيل قعدت فيها بس كم شهر .. جاتني رساله من سابك عندي اختبار فيها !! (انا كنت مقدم في سابك من قبل كلية الجبيل بس مالله كتب نصيب فيها ) ..
وصرت كل ما اروح مكان اقدم انقبل .. واموري تتيسر .. والحمد لله ..

وكل هذا بفضل من رب العالمين وكرمه ورحمته علي .. ثم بفضل دعاء امي ورضاها علي .. وهذي النقطه اللي اكثر الناس تتساهل فيها وبشكل ملحوظ .. (حبيت اذكرها لعل وعسا أحد يتعض منها)..

الموهم .. قعدت خمس سنوات بالسعوديه يعني تعوق من هنا تنفرج من هنا .. اطلع من الكليه وادخل بمعهد التقنيه واطلع من التقنيه وادخل بمعهد الاداره ...!

وبعدها عرض الوالد علي فكرة السفر للخارج .. وامي ودها تعارض بس ماتبي تكرر اللي صار من قبل .. فكانت تقولي دايم " اللي تشوفه ياولدي انا ماوقف قدامك في مستقبلك ".. وانا اشوف في عيونها كلام غير ..
وكنت ارفض هالفكره متأمل خير ان الله راح يرزقني بالسعوديه واكمل اموري ..
توظفت في كذا وظيفه .. وبعدها بفتره فاتحني ابوي بالموضوع .. قالي رح ادرس برى .. فكرت بالموضوع يمين يسار لقيت ان فعلا الواحد محتاج انه يدرس برى خصوصا ان اوضاعي الحمد لله تساعدني ..
وصرت اقول في نفسي كم واحد طلع برى درس وانا اشوف كل اللي حولي طلعوا برى يدرسون .. طيب بعد اربع سنوات بيتخرجون .. بيجون للسعوديه بشهاداتهم .. وش اسوي انا احط يدي على خدي واقول ياليت ؟!
وفعلا قررت وقتها أني اخلص اموري.. وفعلا رحت خلصت اوراقي .. جبت قبول من الجامعه .. وطلعت جوازي الامريكي .. وخلصت التذاكر .. بالعربي جهزت كل شي مادروا فيني الا انا قاعد بينهم واقولهم رحلتي بعد بكره !
كلهم انصدموا وقتها .. شلون وكيف ماحد يدري .. ورحت والكل مايدري وشلون خلصت امور مافيه الا بس اهلي يعرفون شلون .. اما الباقين في بالهم اني خلصت الفيزا وهالامور .. ومتعجبين شلون خلصها بهالسرعه .. < ضحك عليهم ههههه

والحمد لله .. وصلت امريكا وقعدت اول سنه امشي اموري .. انا مو جيد بالكلام .. بس عندي القدره اني اكتب بشكل افضل لله الحمد .. وهذا اللي خلاني اتخلص من اللغه وابتدي الجامعه على طول ..
وصارت لي مواقف كثيره خصوصا اول رحله ... اطرفها اني ماكنت اعرف اتكلم وكنت ابي اقول للموظفين ان طيارتي بالبوابه الفلانيه .. فكنت اقولهم " مي دور وير وييييي وييي 10 منيتس " .. ( يعني وين بوابة طيارتي اللي بعد عشر دقايق ) هههه

وهذا انا صارلي الان اتوقع ثلاث سنوات اذا ماكنت غلطان .. والحمد لله مرتاح واموري ماشيه .. وهذا بفضل الله ومنته جل علاه ... ثم بفضل دعوات امي الله يحفظها ..

والان قاعد اجهز سفره للسعوديه زياره اقضي معهم رمضان ... صارلي تقريبا ثلاث سنوات ماشفتهمش ...

تقريبا هذا سبب سفرتي .. ووشلون جات ..

وفيه مواقف راح اذكرها برد ثاني للترفيهه ..,

>>> هذا المستخدم جالس يبكي وهو يقرى قصتك

سبحان الله ربي كيف كتب لك الرزق بـ دعوة

الله يحفظها لك ويخليك لـ عين ترجيك >>> بس يرحم والدينك قصص تزعل واشياء لا تعيدها >>> ما تزال تبتسي

الله يجزاك خير ..
والله انا قلتها لاني اعرف اغلب الشباب او بمعنى اصح غالبية اللي مروا علي في حياتي غير مبالين بامهاتهم وبعضهم الله يهديه يعني مايفكر حتى يسألها اذا هي راضيه عليه والا لا ..
وفوق هذا تلاقين كثير يشتكي من مشاكل او معوقات بحياته والدنيا تتقفل بوجهه .. ويقول انا ادعي بكل صلاه وانا افعل وانا اعمل .. وللان مالله كتب لي فرج !
وينسى أن مفتاح الرزق بين يديه .. "أمه".. !

اسأل الله ان يرضا عنا ويعيننا على ديننا ودنيانا ورضا أمهاتنا ..!

موضوع جميل ما قدرت اقرا الردور كلها مشغولة عندي كورس بالصيف بس اكيد راح اشوفها في وقت ثاني
بالنسبة للابتعاث او بالاحري اني اكمل دراسات عليا حتي لو بالمملكة كان اول هدف بحياتي من وقت ما كنت طالبة
واجهتني بعض المشاكل اولها عدم وجود محرم يسافر معايا
الحمدالله وقتها اقتنعت اني اقدر اكمل بالسعودية وبعدها بفترة اتزوجت وسافرت مع زوجي
احمد ربي ليل نهار ع هذه الفرصة لانها حققت لي اشياء كثير من ضمنها الاعتماد ع النفس واني اتعرف اكثر ع قدراتي واللغة واكيد الصحبه الطيبة


بالتوفيق

انا كان حلمي من وقت وانا في الابتدائي كونت ابغى ابتعث

بس مستويا الدراسي ما ما كنت متفوق جدا يعني كونت انجح بجيد جدا

تخرجت من الثانوية علمي قبل سنتين

قدراتي تمام الحمد الله

التحصيلي مو تمام

شلت فكرة الابتعاث من راسي

قدمت على جامعة الملك عبد العزيز وام القرى

ما ابغى ابعد عن جدة او مكة بالكثير

انا ميولي ابدا مي علمية

كنت محتار في التخصص دخلت ام القرى

وكنت اقراء في التخصصات

كنت ناوي اعلام شجعوني كثير من اصحابي علية

يقولي بتنفع وراح تبدع

اهلي عادي اللي يريحك ادخله

استخرت وما ارتحت قلت يمكن خيرة

قريت عن تخصص اسمه *الخدمة الاجتماعية *

من جد حبيته خصوصا انو انا ماخذ دورات قبل كذا قريبة من هذا المجال وفي المجال التطوعي

لما عرفت اني اتخرج اخصاائي اجتماعي

بدون تفكير اخترتة

من اول ما دخلت الجامعة حطيت هدف قدامي ابغى اتخرج واتعين معيد

في هذا الوقت كان قريبي يقدم على الدراسة في امريكا على حسابة

قبل ما يسافر باسبوع عملو عشاء دري ابوي انو مسافر

قالي ليه ما قلتلي كان حطيتك معاه

من وقتها عرفت انو ابوي مو معارض المبدى

وامي نفس الموضوع

بديت ابحث من سنة على اساس انو اذا تخرجت يكون عندي المعلومات الكافية

باقيلي سنتين على التخرج ولسى جالس ازيد معلوماتي

عارف انو مررررة بدري بس بجد ماخذ كلي تفكيري

اللي جد في الموضوع سرت اخذ دورات في تخصصي خارجية

في المجال الطبي * الخدمة الاجتماعية الطبية *

يدات فكرة الاعادة تتلاشى شوية

لاني شفت متعت مهنتي في الممارسة مو في التدريس

تكلمة كثير مدري يفيدكم في ايش

لكن وانا اكتب حاط في بالي هدف بعد سنتين اذا ان شاء الله ابتعثت ارجع اقراء ردي هذا

الله يوفق الجميع

^^^^

معقولة ممكن ارجع في يوم من الايام اقراء كلامي هذا

واقول تحقق الحلم وانا الان مبتعث

ممكن ليش لا ...

ي زين موآقفكم ..

اخوي بدالرحمن ,, ترى الوقت الحين يتسابق .. لا يهمك بأذن الله بيجي يوم تقرى هالرد و بجنبك عيآلك و بأيدك شهادتك اللي جايبها بكل فخر من برى ..



عسى الله يسهل لكل مبتعث و يعينه على غربته و يحفظة و يستر عليه