من يتكرم ويساعد أختي بخصوص التخصص،،

من أجل الإجابة الصحيحة والدقيقة على هذا السؤال ، نحتاج إلى شخص درس جميع هذه التخصصات من أجل عمل مقارنة منطقية بينها وهذا مستحيل!!
ابحث في قائمة الملحقية من أجل معرفة التخصصات المغلقة والمتكدسة..
ربنا يوفقك,,

والله انا كنت بادخل كمبيوتر ساينس لكن شفت فيه تعقيدات كثيره ورحت للكمبيوتر انجنير ولقيت الوضع كويس بس مو مثل ماتوقعت .. ولما عرفت الانفرميشن ساينس ... حولت له وقررت اكمل فيه ..

اسهل تخصص من بينها هو الانفرميشن ساينس .. والسبب أن الكورسات المطلوبه بالتخصص تكون عامه يعني مافيه شي متعمق ! .. اللي بتتعمق فيه هو التخصص الفرعي اللي راح تختاره !
كل المستويات داخل الانفرميشن ساينس لا تتعدى مستويين تكمليين ! يعني ممكن تاخذ انترودكشن او مستوى بدائي .. وبعدها تاخذ المستوى الثاني .. وخلاص توقف .. يكتفون بهالشيء !

طبعا بعكس الكمبيوتر ساينس .. جدا متعمق في كل الكورسات .. يطلب فيها كورسات برمجه .. وتكون مره متقدمه ومختلفه ... يعني اللي اذكره من كورسات البرمجه بالكمبيوتر ساينس .. انهم يعطون C# او C++ بكورسين متقدمه ..
وايضا يعطون كورسين ثانيه للجافا ! فهذا الوضع جدا ثقيل للي مايحب البرمجه ..!

بينما الانفرميشن ساينس .. اخذت فيه بس كورسين جافا ! الكورس الاول بسيط جدا للمبتدئين .. والكورس الثاني شوي متقدم بس على خفيف يعني مافيه هذاك الخوف ! (افضل من اربع كورسات برمجه ! )

اما الكمبيوتر انجنير .. والله اكون صادق معك .. انحشت منه لما شرطوا علي اخذ كورسات الكترونيات ! يعني بيكون فيه الكترونيات .. والالكترونيات عموما حلوه لكن بدايتها تكون صعبه بالنظري ! انا جيد بالتطبيقي لكن نظري تعبان جدا !
وطبعا التخصص يعطونك فيه برمجه على ما اذكر لكن بس كورس واحد ! .. لان التركيز كله راح يكون على الهاردوير اكثر شي !

الفايده من الموضوع .. إن الشخص لابد له أن يختار التخصص اللي يقلل عليه الكورسات المطلوبه .. لان التخصص الفرعي اللي راح يتخصص فيه غالبا يكون ماله علاقه باي من الكورسات اللي اخذها ! ..
على سبيل المثال .. انا دخلت كمبيوتر ساينس .. وابي التخصص الفرعي يكون (تصميم جرافيكس او ملتميديا) ..
اخذ مثلا 119 ساعه كلها كورسات برمجه + كورسات قواعد بيانات + كورسات شبكات .. الخ يعني كل هالكورسات مالها دخل بالجرافيكس ! فليش من الاساس اتعب نفسي فيها وانا عارف ان اخرتها جرافكيس وماله شغل في البرمجه !؟

فمن هذا المبدأ الواحد يحدد التخصص الفرعي اللي يبي يتخصص فيه .. حتى يعرف ايش يدرس وايش يخلي ! ويختار التخصص اللي يناسب التخصص الفرعي ! ..


إختصارا للوقت والكلام ...

اعطيك نصيحه راح تفيدها وتفيد اي شخص بنفس وضعها سواء بنت او ولد !

إذا كانت متمرسه بالحاسب الالي وعندها سابق معرفه بلغات البرمجه وكيفية التعامل معها .. وماعندها اي مشكله انها تتعلم كل الامور بالحاسب وتخوض التجربه .. هنا انصحها بـ (Computer Science) ...

إذا كانت تحب الحاسب .. وماعندها مشكله لو تعلمت شوي الكترونيات .. وتحب تتعمق اكثر بالهاردوير والسوفت وير (يعني تكون دعم فني) فعليها بتخصص ( Computer Engineer ) ...

إذا كانت متمرسه بالحاسب .. وعندها قدر كافي من المعلومات بالحاسب .. ولكن ماتحب البرمجه كثير .. بس تبي شي يكون خليط من الكمبيوتر ساينس والـ Management Information System ... وتهتم اكثر ببرامج الحاسب .. وتبي بس تتعمق في التخصص الفرعي .. فعليها بـ (Information Science ) ...


هذا والله اعلم .. ,

شكرا لك أخوي الله يوفقك،،

كفيت ووفيت أخوي الله يجزاك الجنة
شكرا لك,,