كيفية ادارت المخصصات الماليه من مكافئه وغيره ( الرجاء الدخول وكتابة التجارب )

المكافأة حدها للمواصلات و السكن و الحضانة و الأكل و الأشياء الضرورية للأطفال. اما باقي الأشياء الفرعية او الغير أساسية (مثل ثياب كتب العاب للأطفال) فهي من المساعدات الخارجية (الأهل سابقا و المساعدات الأمريكية (لتغطية مصاريف الحضانة وتمكننا من الترفيه عن انفسنا بشراء شوية ملابس وكتب والعاب للأطفال) حاليا)
تحياتي,,,

في نظري اهم شي تفصل بين الامور الاساسية الضرورية وبين الكماليات

أنا بالنسبة لي.. أقسم المبلغ اول ماينزل في الحساب..

المكافأه 1350..
- 300 أحولها لحساب ثاني فاتحه بنفس البنك (مو حساب توفير.. بس نفس الفكره بدون فوائد)..
- 500 للسكن..
- 200 أسحبها كاش..
- 150 للأغراض حقت المطبخ..والحمام
- 200 أخليها في الحساب..

طبعا ماعندي سياره.. والمواصلات عندنا مجانيه..
أما للفكره العامه للطريقه اللي مسويها.. الـ 300 هذي موفرها للسفرات..
الميتين دولار.. فايدتها إذا وصل حسابي البنكي تحت الـ 20 دولار.. تطلع الميتين دولار واحط البطاقه في الشقه.. بحيث إني أزبط نفسي لأخر الشهر على الـ 200 دولار..
150 دولار.. لأغراض المطبخ.. رز.. ولحم.. وأكل سريع التحضير..منديل.. ومعجون أسنان وغيره.. طبعا تكفيني وزياده.. أنا أطلع مرتين لـ walmart بالشهر.. كل مره أصرف حدود الـ 70 دولار.
الـ 200 اللي أخليها بالحساب.. هي اللي أصرف منها.. في الأكل من المطاعم وتسديد فاتورة الجوال.. وغيره.. طبعا أنا أحب أكل البيت كثير.. والحمد لله قليل أضطر أني أخلي البطاقه في البيت آخر الشهر.. أحيانا تبقى الـ 200 دولار الكاش للشهر اللي بعده.. واوفر بدال الـ 300 تصير 500 دولار..
أما بالنسبة للملابس.. إذا إحتجت شي طلبت من الأهل
طبعاً المواصلات عندنا في الديره مجانيه..

أتمنى أني أفدت الأخوان..

طيب ممتاز ياشباب يعني فعلا لو الواحد رتب اموره تمام يمكن انه توفيه المكافئه وتزيد

بس اخوي ( خارج الخدمه )
السكن 500 دولار جدا ممتاز
بس من خلال بحثي في المواقع ( لسه بالسعودديه من طلاب المرحله الرابعه ) ماشفت شي اقل من 900 دولار

اتمنى من الجميع المشاركه

طيب تبلغ قيمة المساعدات الامريكيه ؟؟

بالنسبة للسكن.. أنا ساكن في شقه sharing.. فيها 4 غرف نوم.. كل غرفه بحمامها.. والصاله والمطبخ وغرفة الغسيل مشتركه..

طبعا الأسعار تختلف من مدينه لمدينه ثانية.. وحسب بعدها وقربها من الداون تاون والجامعه؟؟

والله وانا اخوك اانا ناوي اسكت مع عائله بس ابيها بمواصفات خاصه عشان اني متزوج يعني لو تكون مكونه من مراه واطفالها ببس االسئال
العائله تاخذ المبلغ على الشخص الواحد مثلا 500 لي و 500 لزوجتي
*********************
طبعا اخوي خارج الخدمه انا من خلال بثي لقيت اقل شي 800 دولار للستديوووو
طبعا مستقل

بالنسبة للأسعار فهي تختلف بشكل كبير.. ممكن تقولي أنت وين ناوي تكمل دراستك بأي مدينه أو ولايه عشان أساعدك..

يعني فيه مدن تقدر تلقى فيها شقه كامل.. غرفتين وصاله بحدود 750 دولار.. وفيه مدن مثل بوسطن و LA مستحيل تحصل تحت 900..

أما عن نظام السكن مع عائله.. فهو نفس الشي يختلف من مدينه لمدينه.. عندنا هنا تسكن مع عائله قريب من الجامعه بحدود 450 دولار.. بعيد عن الجامعه بـ 350 دولار..

وأسمحلي أدخل شوي بخصوصياتك.. إذا كان المدام بتكون مرافقه وماراح تكمل دراستها.. ممكن تروح أنت لحالك بالبدايه لمدة 6 شهور.. تسكن مع عائله.. وترتب وضعك.. ومتى ماشفت إن لغتك تحسنت ممكن تجيب الأهل.. لأنه حرام يتشحططون معاك في الغربه.. طبعاً العائله تاخذ على الشخص مو الغرفه..

وبخصوص أسعار النت.. هي تقريبا أسعار المدينه.. لأن المدن الأمريكيه تخضع لنظام الـ rent control من الحكومه الأمريكيه.. وهو اللي يحافظ على الأسعار ماترتفع ولا تنزل.. طبعاً ممكن تلقي فرص لو تدور أنت بنفسك..