ما بعد الوصول الى واشنطن

اخر سوال معاي بالشنطة الشخصية عطر هل هذا عادي والا يسبب مشكلة؟؟ ومشكورين جدآ

هلا بك اخوي ..

اذا كنت على الخطوط السعودية فالملحقية تستقبلك تلقائيا بدون ماتراسلهم .. لكن أنا أنصحك إنك تراسلهم أفضل يعني من باب الاحتياط ..

بالنسبة لشنط العفش الخطوط السعودية ماعندهم مشكله يمشونك عادي لاي وزن .. لكن المشكلة بالخطوط الداخلية بأمريكا ,, عشان كذا بما انك عندك شنطتين حاول ان كل شنطه ماتزيد عن 23 كيلو ..

بالنسبة للشهادات ,, ماعندي خلفية عن هالموضوع لكن انا افضل انك تاخذ كل مستنداتك الاصلية وتصورها كم نسخه .. لكن حافظ عليها اذا سافرت ..

بالنسبة للرحلة روح قبلها بساعتين أفضل وأريح لك ..


موفق يالغلا ,,,

اول شي يالغالي اعتذر لك عن التاخير بس ولله اني حطيت الرد اكثر من ثلاث مرات وفي كل مرة يرفض ينزله المنتدى فارتفع ضغطي

بالنسبة للعفش

اذا عندك اي شك بان هالشي يمكن يتصادر حطه في شنطة العفش اللي راح تنشحن بالطيارة

سواء كان عطر او دخان

لان الشنطة اللي راح تاخذها معك بداخل الطيارة هي اللي راح تتفتش

وفيه واحد كان معنا بالطيارة يقول انهم صادروا منه كرزين دخان يوم بالتفتيش ولو انه حاطها في العفش اللي انشحن كان ما صادروه

وازيد على كلامك يالغلا ان نظام قص البوردينج لامريكا ما يفتح الا قبل الرحلة بأربع ساعات.

الله يجزاك خير اخوي مشعل والله توني بسالك السوال الاخير ومشكوووووووووور جدا جدا على ردودك..
اخر سوال الابتوب بحطة في شنطتي الشخصية الي بدخلها معاي الطيارة لانه صغير وماودي اخذ شنطيتين شخصية ولابتوب فهمت؟؟
وجعلها الله في موازين حسناتك

الاب توب والاجهزة عادي تدخلها معك للطيارة يالغلا

سواء كانت الرحلة من الرياض الى امريكا او رحلة داخلية امريكية

اخوي مشعل انا ابي مكتب سياحة في الرياض ابيه يحجز لي مع عائلة اذا عندك خبره في المكاتب علما ان مابقى الا تقريبا 16 يوم على الرحلة..

ولله يالغلا المكاتب السياحية بالرياض كثيرة

واشهرها مكتب الطيار ومكتب الصرح

ولهم مواقع خاصه تقدر تتصل عليهم وتحجز عن طريق التلفون او تروح لاحد فروعهم

" وهو بياخذك للفندق حتى لو انت على حسابك بياخذك ترى يعني مو مثل ناس شفتهم معي جايين على حسابهم ورايحين ودافعين لفندق قبل لا يجون لامريكا حرام لان الفندق اللي بيوديك له مسوي تخفيض لنا كسعوديين (الملحقية اظن متعاقده معه)

طبعا الفندق مو بواشنطن الفندق بيكون في ولاية فرجينيا وروعه الفندق ومن بكرة الصباح راح يجيكم وياخذكم على الملحقية وكل غير هذا بتعرفونه في الملحقية لان بيسوون لكم محاضرتين"


الأخ مشعل هل يعني هذا انه لايلزمني أن أحجز من هنا"أنا مبتعث على حساب الوزارة+رحلتي الخطوط السعودية" واذا لازم اراسل الملحقية وش ارسل لهم+وش ايميلهم او الفاكس بتعهم؟؟؟

ومشكوووووور على وقتك

اهلا

لا تحجز اي فندق وانت بالسعودية لان الملحقية بتتكفل بكل شي وما عليك الا انك تدفع حق السكن لما يودونك للفندق

طبعا الملحقية على كل رحلة على الخطوط السعودية يرسلون واحد يجلس بالمطار الى ما يطلع كل السعوديين من المطار

ولكن اظمن لك ومدام معك قرار ابتعاثك ادخل على موقع الملحقية على النماذج فيه نموذج حق الرحلة حطه وارفع قرار ابتعاثك