مساعدة هل بسبب الابتعاث سأفـقـد أختي للأبد حقا ً؟

اضافه الى ذلك مالسبب من كل ذالك الخوف والرهبه التي تلقاها كل فتاه مبتعثه اذا كانت منضبطه وبحضور محرمها (فهي لم تعصي الله) ام هي فقط معتقداتنا و ظنوننا الشكاكه االتي خلدتها عاداتنا وتقاليدنا التي لاصله لها بالدين ؟؟؟؟؟؟؟؟؟؟؟وانما جهلنا واخذنا بالمقوله (الشر يعم والخير يخص ) انا لاانكر ان المجتمعات الغربيه هي النقيض لما نعيشه في بلادنا وان الشيطان والهوى معنا اينما كنا ولكن هل نستسلم للتشاؤوم والخوف ام نتوكل على خالقنا فهو مدبرنا وهادينا اخي العزيز ليس كل مايقال صواب وليس كل مايقال خطأ ولكن بادراكنا للامور تتبين لنا الصوره
اجعلني اسالك سؤال لو كنت انت المقبول فما هو ردك ؟؟؟؟؟؟؟؟؟؟؟؟؟؟؟؟؟؟
هل ستتأثر في كل كلمه تقال وترفض الفرصه التي سنحت لك ام انك ستستغلها ولن تفلتها بالرغم من كثره مانسمعه عن المبتعثين (الذكور )وعودتهم الفاشله ؟؟؟؟؟
اخي .... لكل منا وجه نظر وانا قد اكون مخطأ او على حق شكراا

السلام عليكم ...
اسم الله على اختك من الضياع ..
شوف اخوي اول شي قول ( اعوذ بالله السميع العليم من ابليس واعوانه ) ^_^ و صلي على النبي وآله
لا توسوس اخوي كل شي مقدر ومكتوب و اي بنت اكيد بتخاف على سمعتها اول شي وسمعت اهلها و الإبتعاث زي مافيه مساوء فيه بعد خير كثير وياكثر السعوديات الي رجعو وحققو لنفسهم انجاز ورفعو راس اهلهم بمحافظتهم على نفسهم
اخوي مسألة ان اختك تضيع او لا هذا شيء بعلم الله ثم شي راجع لطبيعتها هي وايمانها وتقواها
في بنات لما يكونو على راحتهم بالسعودية يستمرو هناك وفي بنات لما يكونو مكبوتات بالسعودية ياخذو راحتهم هناك وفي بنات زي ماهم بالسعودية برا السعودية مايتغيرو ويارب اختك من هالنوعية الاخيرة
يعني اخوي كل بنت تختلف عن الثانية يعني حتى لو في بنات انزاحوا عن الطريق الحق مانقدر نعمم ونقول الكل كذا ..
في شي مهم لازم الكل يعرفه البنات الي يضيعو ويفلتو الحبل شوي الله يستر عليهم دنيا وآخرة هم بلاساس يبون هالشيء محد ضاحك عليهم ولا مستهبلهم لانه ماعاد في جديد الافلام والمسلسلات والحكاوي بين الناس ماقصرت صارت حركات والاعيب الشباب كلها معروفة ومكشوفة
يعني لا تخاف على اختك ان احد يضحك عليها او انها تضيع ربنا يحميها
بالنسبة لك انت الحين طالما ماشاء الله عليك الله يثبتك يارب فيك غيره على محارمك و تحبهم عندي لك افكار تقدر تحمي اختك وتكون جنبها حتى وانت بعيد عنها
طبعا رح يكون معك ايميلها كل فترة والثانية ارسلها شيء يجدد قوتها ويقينها قصص مواعض من هذه الاشياء
اتصل عليها وحاول تبين لها خوفك عليها يعني لما تنهي المكالمة انهيها بعبرات ماتحس اختك فيها انك شكاك بالعكس تحسك انك تعزها وتخاف عليها مثلا قولها الله يحيمك ويبعد عنك شر شياطين الانس والجن انتبهي لنفسك تراك غالية من هالعبارات الي تذكرها بغلاوتها عندك و بخوفك مو شكك او سوء ظنك بها

همسة اخوي البنت الي انت ناسخ ردها كانت توها ماسافرت هي جات تنقل كلام وحدة اجنبيه اختك مجرد تمسكها بالحجاب بيكون لها هيبة و ماراح يصير الشي الي كتبته هالبنت لا احد رح يلمسها ولا احد رح يتعرضلها الا برضاها هي انا لما رديت على البنت لانها قالت لازم الي تطلع تكون متزوجة فحبيت اوضح ان الرادع الاساسي هو تقوى الله مو الرجال سواء الزوج او المرافق مع ان وجودهم ضروري جدا لانه تشريع من الله وجوب وجود المحرم وارضاء له ولأنه على الاقل يعطي مجرد هيبة قدام الناس حتى لو كان المرافق مو ذاك الزود بس وجوده ضروري والبيوت اسرار بس الناس لهم بالظاهر اذا شافو معها محرم بيخافون يعني اخوك الي بيطلع معها انتم رجال زي بعض كلمه وفهمه هالنقطة بطريقتك ^_^ ...

اختك لا تشك فيها او تسيء الظن فيها ابدا انتبه ولا تفكر مجرد تفكير انك تقارنها او تحطها بوضع او إطار بنت ثانية كل ماطرا هالشيء ببالك تعوذ من الشيطان

اهم شي اخوي ادعي لها بظهر الغيب دائما واحسن الظن بالله و الله عند ظن عبده به ^_^
....

لا تعليق على نو كومنت

بالعكس الاجانب صح عندهم حريات لكن في شئ مهم هم يحترمون الوقت اجل كيف لو كانت اللي قدامهم محترمه


كل اللي اقدر اقوله الاحترام اقوى العلاقات الانسانيه اللي محترمه نفسها وعارفه حدودها والله ماحد يقدر يكلمها


شوفونا في السعوديه البنت المحترمه اللي يقرب منها او يرمي عليها كم كلمه تطنش وتمشي في حالها ماراح يكلمها مره ثانيه

لكن اللي تبغى هالشئ عارفين الطريق ايش بيكون


خل اختك تسافر وتشوف مستقبلها

الله يوفقنا جميعا

تصدق من مجرد كلامك احترمت اختك حيل و مأنا ماعرفها !!
و لو ماأنها أخت رجال و متربية صح ماكان أنت خفت عليها هالخوف و ماالومك أخوي..
بس لاتشك ولا توسوس..
ياما بنات سافرو و اتغربو و رجعو لديرتهم رافعين الراس و بالشهادة و مامسهم جنس آدم ..
سالفة اللمس و الأحتكاك هاذي ماتصير إلا لما البنت تعطي وجههـ للشباب
و اختك ماراح تعطي كل واحد الا حقه و بس و ماراح تكثر و تزيد..
و المخاواه و التعارف و الصياعة على قولهم موجودة في كل مكان .. فلاتكبر الموضوع..
و حط في بالك اختك اذا تبي هالامور بتلاقيها هنا بامريكا او بالسعودية
و عشان ازيدك من الصراحة دام اخوها مثلك على الرغم من صغر سنك واعي و عاقل و محترم اكييد هي بتكون على خلق و ادب و صدقني ماراح يصيبها الا كل خير ان شاء الله..
و في شغله بعد... الطيور على اشكالها تقع .. يعني الصايعات راح يتجمعون سوا والطيبات الصالحات راح يتجمعون سوا..
فبأذن الله أختك راح تنضم لمجموعة بنات حلال بيعاونوها و بيساعدون بعض و بيحمون بعض..
لاتحاتي و أنا اختك و أستودع أختك اللله الذي لاتضيع ودائعه..
و أنت بعد لاتقصر و زورها في كل اجازاتك و بس تتخرج خلك مرافقها بدل أخوك الكبير..
هاذي نصيحتي لك وآسفة اذا تدخلت شوي بس الحماس أخذني.. ههههههه

موفقة الغالية أختك و موفق انت اخوي..
و أتوكل على ربك ولاتحاتي..
الزين زين وين ماحطيتهـ و مايخربهـ البلد

السلام عليكم
بصراحة الأخ الي كاتب الموضوع بلا تخلف يعني انت مو واثق في أختك!!!
عيب والله والبنت ان شاء الله ماعندها هالحركات تبي الشهادة ترفع روسكم بلا جهل الله يوفقها ويصبرها على الغربة
وشكرا

هذا أنت قلتها أنها مثل أمك يعني هي اللي كانت توجهك وتنصحك وتساعدك ..يعني مستحل تطلع منها الزله .وبعدين في الغربه راح تحتك مع أخوك أكثر وراح تقوم سلوكه وتوجهه وتطلب منه المساعدة وهو بيحس بالمسؤليه ويحاول أنه يكون بأحسن صورة عندها ,وأنت خل عنك هالكلام لانه أكيد صاير مع بنات رامين الحجاب وفالين الشعر وأهم شيء يعيشون يومهم وأخر طموحهم أنهم يوسعون صدورهم مع هذا وذيك ,,,,تطمن وأدع لها بالتوفيق وخلها تكمل حلم حياتها .

..

للأمانه ماقريت كل الردود بس بقلك شغله وحده وهي بصفه عاااااامه ولها استثناءات

احنا بنات السعوديه خوافاااااات

خلي وحده فينا تكون في الشارع ويجي واحد يقرب ويتكلم .. ياتحط رجلهااا .. ياتفتح فمهااا

فما بالك لما نكووون هناك .. !!

وشي تاني .. البنت اللي تبغى تسوي شي .. والله لو تحطها بغرفه مالها منفذ بتسوووويه ومابتضب لاحد حساب ..

بس الواضح ان اختك عاقله ..

ولا تنسسسى هنااك غربه وخوفنا يتضااعف .. تربيناا ع كذااا

واستودعها ربي وأنا اختك .. واتحداك ان جاها شي ولا قرب جمبها حتى

طيب انا ليا فتره ادخل المواضيع لكن افضل الصمت عن الحديث...
لكن انا رح اكون معك صريحه واحكي ليك التجارب اللي صارت معي, ومع زميلات دراسه ..هنا

انا بنت كتير متشدده بموضوع الحجاب والتستر..لانه نحنا اتربينا في دوله مسلمه ..
.( لانه للاسف الشديد ماقولك كل البنات, لكن معظم البنات بنطونات جينز وبلايز ضيقه..وانا اجري وراهم في المعهد اسحب البلايــز..! طبعا وحده منهم قالت لي شكرا..وبلا اكتراث..) - الله يسامحنا اجمعين..( انا مجرد مصدومه..مااحاسب احد ولا اقيم احد)
لما كان معظم البنات كدا, صرت انا البنت الملفته من بينهم, قابلني واحد كندي مسلم,شافني صدفه وركز علي - ا..ومشيت بطريقي لاني كنت وقتها طالعه من الغرفه..اليوم التاني شافني..وقالي: انتي كتير متستتره انا مو قادر اشوف شعرك..مو قادر اشوف شي منك ..غير وجهك..!سألني.: انتي متزوجه..؟! قلت له ..لا.! قالي غريب..كيف اللي متلك مو متزوج.!؟ استتنكرت سؤاله: قالي ..كيف بنت جميله مو متزوجه..انا شوفت كل البنات السعوديات بالمعهد مافي احد متلك ..بطريقة حجابك..! وبعدين بعد كم يوم..! قالي..انا اتمنى اني اتزوج بنت سعوديه.وكنت مستغربه: وكل اللي انا ابغاه اني امشي بطريقي..قام قالي: اتمنى اتزوجــك..! حسيت انه الشخص صفعني على وجهي..! سكتت ...وقلت اتمنى انك تلاقي الاحسن مني..! وعن اذنــك..ومشيت بطريقي..


2-
شافني واحد مسلم كندي تــــاني ... في مكان ..وانا لما يكون وقت الصلاة ..اصلي..!
وقف وسال صحبتي وقالها انتو تصلو 5 مرات باليوم..!؟ قالت له ايوه..
المهم هذا الشخص قالي: اذا تحبي هذا رقمي اذا احتجتي اي شي.انا بخدمتك ..او اذا تبغيني اخذك تشوفي كل هذه المدينه..!!
قلت له: كتيــــــــــــــــــر شكرا.وعن اذنـــك..! كان هذا موقف..صار..( كان منزل عيونه بالارض..وكان خجلان كتير وهو يتكلم..)
بس ماكان مهم عندي..انا جايه ادرس مو جايه اتكلم مع اي واحد من هدولا الرجال..مابدي شي منهم اصلا انا..!
3-
كانت في بنت اللي يشوفها يقول هذه البنت فيها غرور ..وتلبس بنطلون وبلوزه..( ومااابالغ نص شعرها برا..وكأنه الطرحه شويا ورح توقع..او تطيح)..قالت لي ..انا مابدي اشتري الشنطه اللي نلبسها على كامل كتوفنا ..قلت لها ليش..؟ بتخيل انها اريح واحسن..بحمل الاغراض..! قالت لانه تشد على الصدر ..فـ مو كويس يعني..! وقفت شويا وصرت اطالع فيها..! مصدومه.. بنطلون لــو ويست وبلوزه ضيقه..و !بس عرفت كيف هي حياتها..ابوها طلق امها وهي عايشه مع اخوانها بشقه خاصه فيهم ومع الخدامه..! وابوهاكان يتزوج ويطلق..(وطبعا ابوها بعيد كل البعد عنهم ..كل اللي يعرفوه فلوس بس) مين اللي يــوجه..!!؟؟حزنت عليها بكل احوالها..لاني بالنهايه انا انسان..

4-
في بنت تانيه قالت لي , ماقدر اتحمل هذه البنت السعوديه الغير المتحجبه..انا اشوفها قليلة ادب..قلت لها ليش؟ قالت تتكلم كتير على اهل ابوها وتقول مطاوعه ..ومتشددين.!؟ بصراحه انا استغربت منك يانونا كيف تماشي هذه الاشكال..انتي يانونا..!؟ قلت لها..انا احب اقعد مع كل الناس واكون قريبه منهم لكن بعيده بنفس الوقت....لكن ( اصدقائي او صاحباتي هم اكتر ناس قريبين مني وانا قريبه منهم..)..!! وقالت فورا: بصراحه يانونا..! انا صحيح قبل كنت مش متحجبه كنت اطلع متلها كدا بلا حجاب والبس القصير والضيق..! والحمدالله اني اتحجبت لكن بحياتي ماتكلمت بـ قلة ادب عن اهل ابويا لو ايش ماصار..!؟ وصرت اطالع في حجابها.. وانا مصدومه لابسه بنطلون ضيق وجلد وبلوزه ضيقه للفخذ..وقلت لها..الحمدالله انك متحجبه وهذه نعمه كبيره..عيونها غرقت دموع وقالت ..انتي ماشوفتي كيف الرجال كان يعاملوني واي نوع من الاذيه كانت تجيني..!
لب لب لب...
5-

كان وقت رمضان ولما كنت بالمعهد..كنت ماشيه مع البنات..قالت واحده منهم..وآآآآآآآآآآآآآه شوفي هذا الشاب ..! مااجمــــــــــــــله..! مو قادره اشيل عيوني عنه..! صرت انا اكلم نفسي..ايش مفهوم الصيام هو؟
وصرت اجاوب نفسي: انهـــا تركز بالنظر بالرجال الحلوين..! ووتتغزل فيهم ..T_T

6-
وموقف مختلف تاني..: وانا ماشيه مع واحده من البنات عرفتني على صاحباتها كلهم..!! طبعا والانسان بالغربه يخاف على نفسه وعلى دينه وعلى سمعته..وعلى كل شي..! وقالو نروح نتعشى بمطعم كتير مرتب..!
قلت انا موافقه ..حسيت اني محتاجه اخرج ..واتمشى شويا..ومع البنات..! وكتير حلو الانسان يتعرف..!
فجأه ..لقيت وحده من البنات تتكلم كلام بـــــــــــــــــــــــــذئ..كلام سوقي..! دناءه..! ايش اقول بس..!
ورحت معاهم للمطعم هذا..كلنا 15 بنت..! قعدنا على طاوله كبيره..وكانت روائح الشيشه بكل مكان..وكل طاوله فيها عرب..وبالاخص سعوديين..وطاوله وحده فيها غربين بنات وشباب ..
!فجاه الشباب فتحو اغنيه خليجيه..وقامو الشباب رقصـــــــــــــــو...!! بساحة المطعم..!!

انـــــــــــــــا بحياتي كلها..! ماشوفت شباب لا باليوم الوطني ولا حتى بــ فرح ولا بأي مكان..! رقص متل الي رقصوه هم..!
صرت حاطه ايدي على فمي..! العدد كانو 3 شباب..ويرقصو ..الغربيين صارو بس يطالعو..فجأه البنات صارو يصفقو ويشجعو..!!
والشباب كانو 3 ..صارو 13 واحد..وانا ماقدرت اتحمل هذا المنظر صراحه..! ولا قدرت اتحمل اني اكون بهذا المكان..!
البنات تشجع وتصفق..وفي بنت تتغزل..وفي بنت بدأت ترقص مع الانغــام...

اخذت شنطتي..وقمت من الكرسي..! قالت البنت: على وين..! قلت بمشي..! قلت عن اذنكم..فرصه سعيد اني شوفتكم اليوم ه..!
ومشيت بلا تفكـــــــــــــــــير..ورجعت بيتي وانا مبسوطه..( كرهت نفسي ماوصف لك)..,وآآآآآآه والله اني حسيت براحه كبيره بس رجعت البيت..!

بنهاية الكلام انا اقــــــــــــولك..
الصداقه كـ صداقه هنا كتير صعبه,! الناس هنا ويمشو مع بعض مجبرين..( عالم غريبه) وانا سحبت نفسي منهم..
كل شخص اذا عمل خط مسيره له رح يمشي عليه..!انا بتخيل انسان عندك عزيمه واراده..وقوة ايمان بالله..- والله ولا احد يقدر يكسروه..
الحياة فيها كتير تنـــاقض..
والحياة هنــــــــــــــــــا صعبه..للمسلم تحديدا..!
انا ماانتظر من احد يرد عليا ولا يهاجمني هي مجرد مواقف صارت..
وحكيتها..


انا مااامـــــــــــــــــــــــــــدح نفسي ولا انزهها..
ولا لي علاقه بـ غيري ..
انا انســـــــــــــــــان بالنهايه!
والله يغفر لنا ويسامحنا اجمعين..


ومازال فيه الكتير..بس انا اكتفي بهذا القدر...

تحياتي لك ياااخي الكريم..
وان شاءالله تفخر بااختك في كل شئ..

تحياتي للكل..
د\نـــــــــــــونا

مُريحة انتي يآ / نونا ..

لكِ ورده بينك ..