مدينةBeijing

كان الله بالعون
المشكلة انا خارج بكين والأ تبشر والله
بالتوفيق والأمور سهلة ان شاء الله

اذا حصلت واحد يزبط امورك ابيك تشوفه لي لأني نفس حالتك

أنا والله في شانغ شا لكن من خلال تجربتي ممكن أفيدك
يا أخوي أول ما وصلت قمت بكل هذي الاجراءات
1 - وصلت مطار بكين ومن وقت ما ختموا جوازي رحت في صالة انتظار المطار لمكتب خدمات الأعمال سحبوه لي بالسكانر وأرسلته إيميل على الملحقية ،عندهم نت هناك كمان . كان في واحد بريطاني قاعد يدردش بالماسنجر قلت لهم يخلصوني فكلموه استحى وقام
ولو كنت مكاني أرسل نسخة كمان على ايميل السفارة .خدها كلها من الموقع حقهم

يعني تحتاج في هدي الخطوة إنك تكون كاتب في ورقة :أريد صورة من جوازي اين مكان التصوير ؟ . وادخل على العم جوجل يترجمها لك بالانجليزي . وبالصيني واطبعهم كلهم في ورقة صغيرة . ويكون معاك فلاش ميموري طبعا .
2- استخراج الإقامة تحتاج إنك تباشر الدراسة في الجامعة اللي جايب منها القبول وهم يقومون بالاجراءات .
3- إيجار الشقة أول ما وصلت المدينة كان معايا رقم واحد من الشباب في مدينة أخرى قال لي اول ماتوصل دق علي .فلما وصلت المطار اخرجت الشريحة السعودية من الجوال ووريتهم هيا دلوني على بنت في كشك أدتني شريحة ووريتها الرقم اللي ابي ادق عليه وجربته قدامي على الرقم المطلوب. الراجل كلمني وقال لما توصل المطار في المدينة اللي تبيها روح عند الاستعلامات أو أي أمن وخليني اكلمه . لما كلمه قاله يكتب لي عنوان الفندق اللي اختاره لي على ورقة . قال لي لما تخرج من المطار لا تروح الا عند راعي تاكسي انا ما كنت ادري عن الصين والامن فيها وانك لو تنام في الشارع ولو تتمشى 3 الفجر ماعليك زي ما كنت اسوي، ، . طبعا الوقت كان متأخر بالليل وانا نمت بالطيارة وبصراحة فرق عن مطار بكين في التجهيزات والفخامة . فقمت ملخبط . ومشيت الا نطوا عليا حقين التكاسي - هلو هلو مبسوطين ومستانسين وانا متردد . قلت امشي على القاعدة القديمة انت اختاره ولا يكون من اختارك . فمشيت شوية الين مالقيت راعي تكسي متكي وسرحان وقلت له هلو واديته الورقة . قعد يطل وهو مندهش ومبتسم . وقري الورقة وقال كلام بالصيني فهمت منه انه عارف العنوان. طبعا اول ماطلعت التاكسي دقيت على صاحبي واديته رقم لوحة التاكسي وحسست التاكسي اني خبرت ناس عن طلعتي معاه عشان ممكن ما يلحقوني الا اكون موزع في اكياس .والراجل ما عليهمن القصة نظرة مطمئنة وبريئة ، وهدا على فكرة الوضع العام في الصين ناس ودودين وطيبين . يريحوك كل تاكسي فيه عداد ما يتجاوزوه بماو . ولما توصل يطبعلك ايصال يعطيك اياه لما تسلمه القروش ، وفايدته لو انك نسيت زر ثوب ولا حتى غطا قلم تكلم البوليس يجيبوه لحدك . وحصلت مع الشباب هنا.
الحاصل ياخوي اني رحت الفندق وقابلوني البنات اللي في الاستقبال وما يعرفو حتى هلو هلو حقت اصحاب التكاسي. فعجزت اشرحلهم وقمت امثل النوم والشرب والصباح والارقام . جلسنا يمكن نص ساعة على الابليكيشن . وبصراحة كنت مستحي ادق على صاحبي لأن الوقت صار متأخر جدا . المهم ماقصرت الصينية ودقت على احد معارفها وتخابطنا حبتين انجليزي لين ما فهمهم الهرجة . ورحت رميت الشنط وغطست نوم زي القتيل.
نصيحة
حاول ان تتوقع كل الأشياء التي تحتاجها واكتبها في ورقة بالانجليزي مع ترجمتها بالصيني من جوجل
اجعل من الفندق نقطة انطلاقك اجعلهم يكتبون لك الاشياء وعناوين اماكن هدي الاشياء التي ترجمتها من جوجل حتى تعطي العنوان لأصحاب التكاسي. ومعك عنوان الفندق طبعا حتى تعرف ترجع
بالنسبة لي كان معي قاموس صيني عربي احط يدي على الكلمة وهم يقرونها . بس ما ينفع دايما . في مرة طلبت جبنة ادوني حليب جاموس. !!
كنت اترجم الكلام من جوجل من النت اللي في الفندق وارسله على جوالي واوريهم هوا في الجوال طبعا تحتاج جوال يقرا صيني ممكن تشتريه من هناك او تحول الترجمة لصورة وترسلها من الكمبيوتر على الجوال
المطاعم حاول تسكن في منطقة وسط البلد لان المطاعم هناك عندهم منيو وفيه صور واصبر الله يعينك على همبرجر السمك من كنتاكي وماكدونالدز
واي مكان تروحه يعجبك خد كرته او يكتبوا لك العنوان عشان ترجع له بعدين
اكتب كل ماتريد مترجم واطبعه في ورقة صغيرة خل معك شخص تتصل به عند الضرورة خل معاك تليفون السفارة والملحقية ومكتب الطلبة الاجانب في الجامعة وقبل الكل هاتف شخصين يمكن يترجموا لك بين لغتين عشان لو واحد منهم نايم او مشغول في مكالمة في الستراتوسفير ايضا حاول يكون معك بطاقة اتصال دولي دائما
نفس الطريقة في فتح الحساب خليها زيارتين الاولى تاخد فيها صور الابليكيشنز اللي عندهم ويترجمها لك واحد وتعبيها على رواقه وبعدين تجيهم او ترسلها له ايميل ويتابع معاك بالتيليفون او سوي زي ما سويت انا تعال لهم الصباح بدري قبل الزحمه ومعاك الجواز واوراق عم جوجل واصبر عليهم ويصبروا عليك ترا الصينيين امناء وكمان كاميرات المراقبة شغاله اهم شي في فتح الحساب ان يعملوا لك حساب مع دفتر كشف الحساب وهو اللي ترسله للملحقية . اللي سويته انا ياغالي اني صورته من عند واحد من الشباب في السعوديين واشرت لهم عليه ابي زيه . زي الطفل لما يشوف حلاوة ويقول يابابا ابغا زي دي . ههههههه
لقيت وحدة طيبة جنبي في البنك اسمها اماندا طلعت متخصصة في الانجليزي - بس لا تفرحوا ترى هدي وحدة من 10000 حسب نسبة المتحدثين بالانجليزية في الصين سالتها قامت كتبت لي اسمه في ورقة وقامت سالت لي عنه وحددت لي الموعد حتى انتهيت من شغلتي

العملية كلها ما اخدت مني 30 دقيقة حساب مع الكشف مع الخدمات البنكية الاليكترونية اونلاين مع بطاقة الصراف مع تحويل نقد من دولار لكواي مع ايداعها في الحساب مع جود باي .. والله لو في بنك عندنا اتحداك تسويها لو تنط الا مواعيد ونشوف ابو فلان وجيب تعريف وشاهد ومزكي وشهادة خبرة وعلى فكرة رسوم فتح الحساب واحد كواي يعني نص ريال ... وسلامتكم

يعطيك العافية يا عباس، انتا ميه ميه اعطيتني الزبد من الآخير بس حسستني اني داخل علي موضوع صرفدة .... طيب ليش ما تكون الشخص الا ادق عليه لما اورط مع تكسي ولا ضعت.

علي كل حال الله يوفقنا جميع.

ياخي انت لو في مثلك اثنين كان الدنيا بخير

ياجعل ربي يسلمك وجزاك الله الف خير

والله يا أخي أنا في الخدمة في كل شي أعرفه بس مستواي في اللغة لسه ما وصل لحد أفيدك للدرجة اللي انت محتاجها ، لكن أبشر بأي مساعدة أقدر عليها .
ولو فيه واحد أعرفه تراني ما أتاخر أعطيك بياناته ، محتاج منكم بس الدعاء بالتوفيق . وأي طلب أنا حاضر

الله يوفقك اخوي عباس محمد

المفروض اي واحد وصل الصين يكتب تجربته بموضوع

انا دراستي بشهر تسعه اذا وصلت وتيسرت اموري اوعدكم بشرح تفصيلي بموضوع ان شاء الله

ما تقصر والله يا عباس. الله يوفقك ويوفق الجميع