خبر سار للطلاب قبولات (( لغة , بكالوريوس , ماستر ,دكتوراة ))

حياك الله أخوي أبو ريماس .
أنا عارف الموضوع هذا زين ، وانا متابع المنتدى من فترة لفترة ولكن ظروف الدراسة وصعوبتها جعلتني أغيب عن المنتدى طوال السنوات الماضية ، ونطلب التوفيق من الله عز وجل ، وبالنسبة لموضوع أشباه الرجال انا عارفة زين وحاسب حسابه ، وهم متواجدين بالصين وبكثرة ، أسأل الله لهم الهداية ، وبجد فكرت كثير قبل ماأنزل الموضوع ، لكن والله فيه رجال شرواك يبون البداية ويبون أحد يوقف معهم ببداية الموضوع وأنت أكثر واحد عارف ان الشغله هذي تشغل عن الدراسة وتشغل البال .
شاكر لك مرورك العطر ، وأسأل الله لنا ولك التوفيق وتمشي هالأيام الجاية ونرجع لديرتنا ونرتاح
أخوك / (.......) عضو قديم بعضوية جديده

عسى الله يوفق الجميع
لما يحب ويرضى

والله يرزقك ويرزقنا جميعا

اخوي عضو قديم بعضوية جديده
تمنياتي لك بالتوفيق وانا من رأي ان ما فيها اي شي لو طلبت مقابل اتعابك
جزاك الله خير

اخوك / فراس

جزاك الله خير أخوي فراس ، والله يوفقنا جميعاً لما فيه الخير .

اهلين اخوي ابو ريماس ....

طبعا من حقك انك تدافع عن صاحب الموضوع لكن خل نحسبها انا وياك حسبة بسيطه

القبول 250 كواي = 42 دولار

االتاكسي روحه ورجعة 180 كواي (اذا ماكنت تعرف تتكلم صيني ) = 27 دولار

الفندق (اعرف لك فندق مره نظيف والليلة 112 كولي نقول الادامي بيسكن اسبوع =784 كواي = 131 دولار

شريحة جوال ب 50 كواي (وفيها رصيد بعد ) = 8 دولار

بنجمع المبالغ هذه بعد الفاصل اللي قاله خويك
أصطحاب الطالب لمدة يومين إلى ثلاثة أيام لتعريفة بالأماكن والأسواق والمطاعم الحلال القريبة من الجامعة والتي سوف يحتاجها خلال إقامتة (طيب زين الفقره اللي قبل تقول بتسكنه يوم واحد بالفندق ؟؟ باقي يومين يالطيب!!! انام عند باب بيتك لين تصحى طال عمرك وتوريني مطعم شنجاني وماك سمك؟؟؟)

المهم خلونا نرجع للمبالغ احم احــم ( 42+27+131+8 )= 208 دولار ا


طيب السؤال اللي يطرح نفسه انا ليه اعطيك 480 وانا بأمكاني ازبن وضعي بأقل من نص القيمه يعني انت بس ممكن تتكلف بس بقبمة DHL


نرجع لا ابو ريماس : لاتعتبر ردي شخصي لكن صدقني انا لاعرفك ولاتعرفني والشهادة لله ان في كم واحد انت جايب لهم قبول بــ 500 دولار


والله انهم يدعون عليك ليومك هذا ,,, لكن رب ضرة نافعه صدقني واحد والنعم فيه هنا شيخ ولد شيخ (انت جايب له قبول ) والله العظيم جبلي قبول

واخذ بس 200 ريال على جميع هذه الخدمات (ملاحظة ترى الــ 200 ريال تكلفة القبول )

وازيدك من الشعر بيت 10 % اللي تعطيها الجامعة له .. تبرع فيها لشخص من جنسية عربية على وشك التخرج عشان يسدد فيها رسوم الجامعة .


يعني يا بشر والله العظيم المكافئة تكفي وزوووووود ليه ماتكونون يد وحده زي باقي الجنسيات ( اليمنين - الروس - الهنود - الصومالين ...الخ)


مافي الا انتو يالسعودين كل واحد يتخبى عن الثاني الا ماندر


عموما الله يهدي الجميع وانا اولكم


تـــحياتي ,,,,

شاكر مرورك وتعليقك وحسابتك الدقيقة ماشاءلله . ياليتك قريت ردودي بشكل أدق . الله يهديك انت تقيس كل جامعات الصين على جامعتك !
١- الجامعة القبول فيها ٦٠٠ كواي = تقريبا ١٠٠ دولار .
٢- التكسي روحة ورجعة ٢٧٠ كواي = ٤٢ دولار ( ماأدري كيف حسبتها ١٨٠ يوان ؟؟ أنت تحسب كل مدن ومقاطعات الصين مثل المدينة الي أنت فيها ؟؟ سبحان الله . *
٣- شريحة الجوال . أنا والله نسيت سعرها لأن رقمي معي من فترة ٤ سنوات تقريباً ، وأنت أخبر بسعرها لأنك توك طازه . ٨ دولار .
٤- فندق ب ١١٢ يوان ! ماأدري أيش نوعية الفندق هذا ؟؟!! الفندق الي راح يسكن فيه الطالب قيمته ٣٠٠ يوان داخل الجامعة ٤٧ دولار واليوم الثاني الجامعة راح تعطية غرفه لمدة يومين مجاناً على بال مايقرر انه يسكن بسكن الجامعة او يستأجر شقة .
٥- ال١٠٪ الي تعطيها لك الجامعة أنا أول مره أسمع فيها ! إذا كانت جامعتك سياحية ويلاخقون الطلاب هذا مهب ذنبي ، وأنا أراهن انه مالها تصنيف دولي و متأخرة جدا في تصنيف جامعات الصين .
٦- قيمة أرسالية ال dhl ٣٩٠ يوان ٦٣ دولار . ماأدري ليه ماحسبتها ؟
المبلغ تقريباً ٢٦٠ دولار . وهذا الي وضحته للطلاب الي راح يوصلون بالسلامة بأذن الله خلال الأسبوع هذا وفيه منهم حول مبلغ زيادة وراح يستلمه أول مايوصل بالسلامة أن شاءلله .
والعدد المتبقي فقط طالبين فقط أو إلى نهاية دوام يوم الجمعة هذا مابلغني به المسئول . وبعدها راح أحذف الموضوع و ماأضمن لغير الطالبين المتبقيين الملحقية راح تفتح لهم ملف أو لا بسبب التكدس .
وعلى فكره : ترا أنا مارديت عليك أبي أقنعك أو أبين لك الأسعار ، ولكن أنا بالفعل كنت أبي أوضح الأسعار لأنه ماأنام بالليل من كثر الرسايل على الجوال والماسنجر .
و إذا أنت في ووهان والمكافئه تكفيك وزود أحمد ربك على العافيه ،الطلاب هنا مهب ملحقين .

حبيبي شارينجان : ليه ماتورينا مراجلك وتنزل موضوع وتسوي كل هذا ببلاش !
لأنه أحتمال أني أرفع السعر إلى ٦٠٠ دولار .

كل اللي كتبته انت مجرد تبرير اروح مدينتك واسئل عن الاسعار بكم واتحمس عشان في الاخير خبــــــــر ســـــــــــــــــار!!!

وعلى فكره : ترا أنا مارديت عليك أبي أقنعك أو أبين لك الأسعار ، ولكن أنا بالفعل كنت أبي أوضح الأسعار (حلوه هذه) لأنه ماأنام بالليل من كثر الرسايل على الجوال والماسنجر . (والله ياخوك محد جابرك اذا محتاج والله ابشرارسلي رقم حسابك وابشر )
و إذا أنت في ووهان والمكافئه تكفيك وزود أحمد ربك على العافيه ،الطلاب هنا مهب ملحقين . ( الحمدلله يارب ,, لكن اساطيرك (اعضاء المنتدى القدامى ) كانو يجيبون قبولات في ووهان بــ 500+ جامعتي السياحية على قولتك تعطيهم 10 % ابي افهم ليه التطبيل من الاساس ؟؟؟

حبيبي شارينجان : ليه ماتورينا مراجلك وتنزل موضوع وتسوي كل هذا ببلاش ! ( اخوي الحمدلله انا شايف خير ,, وماني في حاجة اراسل فلان وعلان كني مكتب استقدام واجيبهم هنا على وجيههم واخذ منهم المقسوم (شغل سماسره)
لأنه أحتمال أني أرفع السعر إلى 600 دولار . الله يقويك ويرزقك لكن خوفي يكون احد ضحاياكم واحد مايرحم عاد وش يفكك منه لو راح واشتكى للملحقية اذا مافتحوا له بوابه ويطلع اللي مستقدمه قصدي اللي جايبه انت وبفلوس ؟؟
عموما ماراح اكثر كلام بهالموضوع ,,

احترامي ,,,

ماأزيد على كلام أخوي الكبير . ابو ريماس

يا هلا وغلا اخوي ( شارينجان ) نورت المنتدى ....

انا لعلمك الكل يعرف اني من الطلاب اللي يحظرون قبولات سواء في ووهان او غيرها ما عندي مشكله والفلوس اللي آخذها حق اتعابي وكل اللي جبتهم ولله الحمد انا كنت معاهم خطوه بخطوه الى ان تم ارتفاع اوراقهم والحاقهم بالبعثه وانا اتحداك تحدي اذا فيهم شخص ما كنت معاه بهالطريقة ....

وبعدين انت جالس تحسب التاكسي ومالتاكسي انت يوم وصلت لووهان نسيت نفسك وش كنت تقول .....

اخوي انا على اني جبت اغلب الطلاب لووهان وفيه منهم الرجال اللي هم 2 بس والباقين اشباه رجال انا اقول لك اسألهم وين كلامهم عن الفلوس قبل لا يجيهم القبول وينه يوم الجامعه تكرشهم وتقول وين اللي جاب لك القبول وينه يوم جاء ما يعرف يتكلم لا انجليزي ولا صيني ولغته العربية لك عليها ...........

وأولا وأخيرا اللي جاء عن طريقي واللي بيجي عن طريق صاحب الموضوع بيجي برضاه وبيدفع المبلغ وهو يضحك ان شاء الله

انا معروف ولله الحمد وانت اكيد سمعت عني لكن ما تعرفني لكن انا اتمنى يحصل بيننا لقاء حتى نتعرف اكثر ......

ابو ريماس

السلام عليكم اخوي هاوي ابتعاث

رقم جوالك ضيعته مو عندي

وحبيت استفسر عن :

1- ابي اسم الجامعة ورابطه اللي على النت .

2- وهل فيها تكدس طلاب سعوديين .

3- هل هي معتمدة عند الوزارة ام من المغلقات .

ولا تنسى انك ترسل لي رقم جوالك

كل الشكر انا بانتظارك

اخوي يعني هل تتوقع اني راح اضرك الله يهديك .....

الجامعه اسمها جامعة ووهان ....اذا ماتبيها عادي انا قدمت على القبول ودفعت حق اتعابة لاني كنت شايفك متحمس للدراسة بيصدر لك القبول وراح ارسل لك صورة منه حتى تتأكد واذا بغيت تجي ارسل لي المبلغ وانا ارسل لك القبول ...


وبالنسبة للسؤالين الاخيرة هل هي متكدسة من الطلاب اقولك انا ...انت تتعامل مع طالب سعودي مو مع يماني والا اي اجنبي بيستغلك والحمد لله انا اخاف الله قبل كل شي ما باجيبك هنا واخليك تتوهق .....


وتواصلنا ياليت يكون عن طريق الايميل .....


ارجو الرد في حالة رغبت بالقبول وشكر




......................... رديت عليك اقول :


السلام عليكم

اخوي هااااوي ابتعاااث

اولاً انا جاد بالموضوع مو اني تراجعت

وادري انك سعودي ولي الفخر اني اراسلك


وبعدين لا تفهم خطأ من أسألتي، انا ما اقصد انك تبي تضرني


.. يا صدر القبول رد لي خــبر ..



وألف شكر لك يالغاااااالي .... أخوك أبو مانع رابح الشمري


..



بعد هالرسايل وشلون تبيني اتواصل معك وانت ما اعطيتن رقم جوالك ولا ترد على الخاص في هذا المنتدى والمشكله انك تدري اني حاجز وابي اجي .. وش تسميها ؟؟
وتجيني الحين تقول اني انا اللي ما دقيت عليك .. وان الجامعة طرتني .. . واعرف انك ما قابلتن بالجامعة عند وليم ولا مره .. بعد