بوابة السفارة الهندية (كل ماهومطلوب عن الفيزا الهندية)

السلام عليكم

بقولكم سالفتي مع الفيزا من طقطق إلى سلام عليكم لأني قلت بفيدكم أحسن مما يفيدونكم بعض المكاتب اللي مايدون وين الله حاطهم

طبعاً بما أني نشبه وغثه وعله ومنيب أخليهم ألا لين يعلموني وش السالفة وبالتفصيل وعادي ممكن أسألهم عن كل شي يعني بالعربي ( الله يعين اللي بنشب له )

في يوم الأحد الموافق 17/06/2012 يعني قبل أسبوع رحت للسفاره الهندي فالرياض رأساً على الإستقبال وقلت لهم أنا بروح لبنغلور وأبي أحد يفيدني وش أسوي لأن معي قبول من معهدين ، الإستقبال قالي رح لمكتب 112 وهو بيدل

حصل في مكتب 112 :

أنا : مرحبا ( لأني مدري هو مسلم ولا لا )
الموظف : هلا وش عندك وأخلص ترانا مشغولين
أنا : بما أني في السفاره الهندية فالرياض فكأني ضيفكم فالهند لأن هذي أرض هندي ونحترمها ونقدرها
الموظف : ( كبر راسه شوي وشاف نفسه ) شكراً لك ووش عندك
أنا : أنا أبي أدرس في الهند لأنكم أفضل ناس راح أفهم وأتعلم منهم فلذلك أخترت بنغلور .
الموظف : وش بتدرس
أنا : أنجليزي ومعي قبولين لمعهدين مختلفين وحاسب آلي برمجه لأنكم أفضل ناس فالعالم فالبرمجه
الموظف : ( وهو شاق ذيك الإبتسامه ) جب قبولاتك وأنا بعلمك وش تسوي
أنا : قل سم هذي القبولات
الموظف : شف أو شي جب لنا جوازك وصورة منه + بطاقة الهوية الوطنية أو الإقامة وصورة منها + ضمان بنكي بمبلغ 7000 ريال مهوب شهادة بنكية يفضل من البنك الأهلي لأنهم سريعين فيها + شيك مصرفي بمبلغ 7500 ريال + صورتين لوجهك ومبلغ مدري هو 350 مدري 400 وإذا تبي تشوف صيغة الضمان البنكي رح لمكتب 114
أنا : أنا أبشر وهذي يومين وأنا عندك ومعي كل شي بس أبيك تضبطني وتساعدني لأني ضيف عندك
الموظف : رح ولا يهمك

مكتب 114 دخلت عليه وسلمت عليه لأنه مسلم وماقصر وراني صيغ لضمان البنكي من البنك الأهلي التجاري ومصرف الراجحي وبنك الرياض وقالي رح للمكتبه اللي قبال مكتب 112 وأسأل الموظفة عن بنغلور وجوها ووش الأشياء اللي ممكن تروح لها هناك ومعلومات وهي مهيب مقصره .

رحت للمكتب وماقصرت الموظفه هناك وجلست معها ( تراها عجوز يعني لا تأمل أنك بتكحل ) وطبعاً ماتعرف عربي وجلسنا نسولف بالإنجليزي وعلمتني كل شي .
في نفس اليوم رحت للبنك الأهلي التجاري فالرياض فالفرع اللي على طريق الملك فهد قدام أسواق العويس قبل إسكان وزارة الخارجية ورحت للدور السادس وعطيتهم المعلومات كامله
أسم السفاره بالإنجليزي وأسمي زي الجواز والمبلغ 7000 ريال وأخذو مني 1000 ريال رسوم إستخراج ضمان بنكي طبعاً الرسوم مايرجعونها لو أيش وأخذت لها يوم واحد واستلمتها



رجعت لمكتب 112 في يوم الأربعاء 20/06/2012 الساعة 10 الصباح وقلت له على الوعد جيتك وهي كل اللي تبيه بس ذكرت أني ماجبت الشيك المصرفي اللي ب 7500 ريال وبالعنية ومقصورد هالحركة مني بس كذا بشوف وش بيصير .
قالي يا سلام عليك بس وراك ماجبت الشيك قلت له لأن الفلوس معي في الحساب وأنا بستخدم بطاقة الصراف الآلي حقة البنك الأهلي وبنك الرياض وبطاقات الفيزا والماستر كارد لأني أقدر أستخدمهم دولياً ، قال أجل رح صور لي صورتين من بطاقة الصراف بس ولا تجي الفيزا ولا الماستر معك للضمان والحماية ولاتنسى تكتب رقم حسابك على كل صورة ( طبعاً رقم الآيبان )
وأدفع الرسوم الله يصلحك وتوكل وإذا جا يوم الأثنين ولا الثلاثاء تعال وتلقى جوازك مفيز وكل شي تمام .

عاد قمت أسأله عن في حال ماأعجبني المعهد الأول وأنا سجلته فالشرطة بعد وصولي للهند قال أبد رح للشرطه مره ثانية وعطهم 75 دولار أمريكي ويغيرون لك الإقامة والأوراق وترا كل شي سهل ومايبيله تعب .

وفي الأخير أقول ترا الكلمة الطبيه والحسنه والإبتسامة والإحترام هي أساس كل شي وهي اللي خلصت كل أموري الحمد لله .

وأي إستفسار أنا حاضر ومن عيوني وتراني رقمت اللي في مكتب 112 و مكتب 113 المطوع وقالوا أي شي تبيه أبد لايردك شي دق بس من الساعة 9 الصباح إلى 12 الظهر .

وآسف على الإطالة .

يا خي بالله الشيك هاذا ابو 7500 غير الضمان البنكي

هناك ضمان ٧٥٠٠ الف فقط والشيك المصدق ب ٥٠ الف روبية فقط

مشكوور اخويا الدكتور هندي بس معلش ال خمسين الف روبيه هادى ينفع استرجعها تاني او زيها زي ال 7500

طيب يا شباب انا عااوز بس خدمه انا عاوز حد يجيبلي ورقه قبوول من معهد لغه انجليزيه حد يقدر يساعدني او يقولي طريقه اعملها عشان اجيب ورقه القبلول دى