مســـاعده ياطلاب مصــر

؟؟؟؟؟؟؟؟؟؟؟؟؟؟؟

هلا ابو نايف
جامعات مصر كثيره انت حدد التخصص اللي بتدرسه وابشر بالفزعه

عموما اذا ودك بدراسه سهله ومرنه عليك بالجامعات الاهليه اولا التسجيل سهل وما فيه تعقيد
عكس جامعاتهم الحكوميه اولا اسعار الدراسه مبالغ فيها تدفع حدود 6000 جنيه استرليني بالسنه
وبعدين كانك بتدرس بكالريوس دراستهم الحكوميه بثره شوي اما كانك بتدرس ماجستير بيكون وضعك احسن

عموما انصحك بالجامعات الاهليه عندك جامعت 6 اكتوبر رائعه من اكثر الجامعات اللي عليها طلب اولا فيها طلاب من جنسيات مختلفه عكس جامعاتهم الحكوميه ممكن تصير الوحيد السعودي بالكورس ودام معك جنسيات مختلفه يخفف عليك الضغط النفسي من الدكاتره اللي بغضهم يكون حاقد على اهل الخليج وممكن يستقعد لك
وفيه جامعه برضو في اكتوبر لكن ما اتذكر اسمها لكن المؤسسه للجامعه دكتوره اسمها نوال الدجوي هاذي الجامعه الحلو فيها ان شهادتك تكون مدعومه من جامعات بريطانيه لأن الجامعه اصلا زي ما تقول نظام مقرراتها متعاون مع جامعه بريطانيه وفيها مواد تدرس بالانجليزي يعني شهاده صح بس اسعار ذا الجامعه اغلى من جامعه 6 اكتوبر
صراحه انا من مؤيديين الدراسه بمصر اولا شعب عربي مسلم خفيف دم ودكاترتهم انواع الفله وطق السوالف عكس دكاترتنا نفوس شينه وغثاثه وبعدين لو ينزلون لك حرمان والا يسقطونك تقدر تدخل على العميد وتنشب له ويمشيك
والسكن مره اسعاره مناسبه في اكتوبر مثلا تاخذ شقه غرفتين وصاله ومطبخ ماتكلفك اكثر من 1000 جنيه بالشهر مفروشه طبعا حتى الغساله الفل اوتوماتيك والمواعين والقدور فيها ما تجيب الا ملابسك

اتمنى انك تكون استفدت واي استفسار حاضرين حدد تخصصك اللي ناوي تدرسه

اختك شهرزاد

بــارك الله فيك اخت شهرزاد على المعلومات

ابي ادرس ماجستير محاسبه او ادارة اعمال


بالنسبه للجامعاه بصراحه ناوي 6 اكتوبر بس الضاهر ماعندهم ماجستير

هلا ابو نايف

كانك بتدرس ماجستير ماعندك فرصه الا بالجامعات الحكوميه لان 6 اكتوبر وجامعه نوال الدجوي مافيها دراسات عليا

انا انصحك بجامعه القاهره او عين شمس لانهم تقريبا اقوى جامعتين حتى المصريين موب سهل يدخلونها تاخذ اعلى نسب بالنسبه لخريجين الثانوي

وعندك جامعه حلوان فيها دراسات عليا بس عيبها انها جامعه قرويه نوعا ما دكاترتها موب متعودين على الخليجيين وتقدر تقول فيهم لؤم المصاريه انا اعرف بنتين سعوديات فيها وحده تدرس طب والثانيه تدرس تصوير احترافي مساكين متبهذلين فيها مع ان خوالهم مصريين ولهم نفوذ لكن ما سلمو من البثاره بس انت رجال ممكن يفرق معك وانت طالب دراسات عليا موب مثلهم ممكن يفرق معك الموضوع

وفيه جامعه اسكندريه هاذي ماعليها حلوه وعموما اسكندريه نظيفه وراقيه اكثر من القاهره وشعبها محترم والجامعه مليانه خليجيين وتعتبر المعيشه باسكندريه مريحه نفسيا اكثر من القاهره ولا فيها تلوث ولا زحمه وفيها مواصلات ارقى من القاهره فيها الترام يوصل اسكندريه كلها ببعض وطبعا تكاسي عكس القاهره غصب تركب مع تكسي يزعج راسك بالقرقه والا ميكروباص (لاتعليق على الميكروباصات قطار الموت يمشي بالشارع)

وعندك جامهة الازهر صراحه ما عندي معلومات عنها بس اعرف انها مافيها سعوديين كثير تقريبا مافيها سعوديين الا يعدون على الاصابع بس ماتفرق شي عن الجامعات الثانيه كونها تابعه للازهر الشريف ما يأثر على نوعيه الدكاتره ولا الطلاب يعني لا تتوقع تشوف مطاوعه محاسبين

عموما فيه نظام حلو عند المصريين فيه مكاتب خاصه بطلبه الدراسات العليا فيها دكاتره متقاعدين ويعطون دروس خصوصيه باسعار بلاش الترم بالف جنيه ويسوون لك البحوث ويضبطون كل اللي تبيه و هالمكاتب متوفره بكل مكان ولو رحت لاسكندريه تلقاهم حول سكن الضباط على ما اذكر

انتبه ترى هاذي بس الجامعات المعترف فيها عندنا وترى عندهم خرابيط واجد ماتعترف فيها الوزاره

وعشان تكون مرتاح تقدر تكلم الملحقيه وتراهم متعاونيين ونصوحين وبيساعدونك لو قدرت تكلم د فهد القاشي تراه انسان خلوق جدا وكلامه ثقه

عموما السكن زي ما قلت لك اسعاره معقوله انصحك تستاجر شقه بالقانون الجديد وانت تفرشها بيكون السعر عليك رخيص والفرش تراه مايكلف شي اذا عزمت قلي واعطيك عناوين محلات الاثاث الرخيص

وحتى السياره تكلفتها بسيطه وانصحك لا تجيب سيارتك على طول اقعد لك فتره جرب الوضع ويمدي على السياره

اسفه على الاطاله والله يوفقك

عفوا ابو نايف نسيت اقول لك ترى جامعه اكتوبر ناوين يفتحون برنامج ماجستير وفعلا عمروا المبنى حقه واحتمال يشغلونه بعد فتره قريبه ممكن تتأكد من عميد الجامعه وهو طبيب وحاط ارقامه بموقع الجامعه في السيره الذاتيه حقته كلمه على العياده او الموبايل وبيرد عليك على طول

موقف ان شاء الله

بــارك الله فيك اخت شهرزاد كفيتي ووفيتي يعطيكي الف عافيه

6 اكتوبر طيبة جدا - بس اسال عنها عن طؤيق الملحقية الثقافية واذا تحتاج ارقام الملحقية ابشر العابر العطوف