لجميع الاستفسارات عن الجامعات أو الدراسة بدولة الامارات العربية المتحدة

جزاك الله خير على الاجابه
طيب ..هل جميع جامعات الامارات مختلطه؟

بالنسبه للتحضيري هل يتم معادلته لمن سبق له الدراسه في السعوديه علما بانها نفس المواد

الجامعة الامريكية في الشارقة مختلطة بالكامل .. وتخصصاتها هندسية و ادارية و مالية
جامعة الشارقة .. مختلطة ببعض التخصصات و البعض لا .. الجامعة شاملة لكافة التخصصات
جامعة الامارات بالعين .. اتوقع غير مختلطة ..

المعادلة بما انك جامعية .. فأكيد بيكون فيه معادلة .. جاهز للرد و التفصيل اذا عندك اسئلة اخرى حتى 100 سؤال ..

السلام عليكم و رحمة الله و بركاته . كيفكم ان شاء الله تكونوا بخير اخوي Chemist
اشكرك على جهودك ومساعدتك لشباب واتمنى من الله ان يضعها في موازين حسناتك اخوي مشكلتي مرت عليك من قبل من احد الاعضاء انا طال عمرك ادرس لغه في امريكا و رغبتي ادرس pre pharmcy واحاول اختبر ايلتس واجيب ان شاء الله درجه حلوة و احول الى الامارات لظروف كثيره تقدر اخوي تكلمني عن دراسة الفارمسي عندكم وعن دراستك شخصيا طبعا في جامعة الشارقه وكيف العيش هناك واي نصيحه تقدر تعطيها اخوك الصغير اللي هو انا. وشاكر لك واتمنى لك التوفيق وللمسلمين

وعليكم السلام و رحمة الله و بركاتهـ , اهلا اخوي مطلق فيك و اتمنى اقدر أخدمك باللي أقدر عليه ...

دراسة الصيدلة في الامارات ( بكالوريوس ) فقط متوفرة بجامعة الشارقة - موجودة بجامعات اخرى لكن المعترف و الموصى بها فقط بالشارقة و هذا أولا .. ( يعني ما لك الا جامعة الشارقة و كلية الصيدلة )

الدراسة تبدأ بسنة تحضيرية ( الفاونديشن ) متبوعة ب 4 سنوات تخصص صيدلة ..

الايلتس المطلوب لدخول الجامعة هو 5 من 9 و سهل تقدر تجيبه بالراحة ...

المعيشة ممتازة و الدولة تحترم الانظمة و القوانين و كل شيء متوفر فيها من سكن و امان و خدمات تعليمية ..

اسعار التذاكر من دبي الى الدمام : 670 ريال ( بالتخفيض فقط )
من دبي الى الرياض 750 ريال ( بالتخفيض فقط )
من دبي الى جدة 990 ريال ( بالتخفيض ايضاً )

و تختلف الاسعار اذا لم تحصل على تخفيض طيران و التخفيص لكل الطلبة السعوديين الدارسين بالامارات سواءً على حسابهم او على البعثة

الدراسة هنا سهلة بالنسبة للجادين بالدراسة و الفشل قليل لأن الجامعات راقية بتعاملها مع الطلبة و الجو العام مميز و مساعد للدراسة ..

من واقع خبرتي بالدراسة هنا .. بصراحة اعتبرها أفضل دولة عربية للدراسة الجامعية مع احترامنا لباقي الدول العربية ..

المشكلة الان : انه توقف الالحاق بالبعثة بالدول العربية ابتداءً من هذا العام ..

بالتوفيق لك في هالتخصص الرائع .. و جاهز للاستفسارات الاخرى

الله يعطيك العافيه اخوووي كفيت و وفيت بس متوقف الابتعاث في الامارات حتى لو انا محول دولة الابتعاث و بتوفيق لك وان شاء الله نشوفك دكتور المسقبل يارب

الله يعافيك , هذا واجبنا ..

شوف التحويل من امريكا الى دولة عربية .. نظاماً كما ذكرت اكثر من مرة ( لا يمكن حدوث ذلك ) , لكن و بكل صراحة بالواسطة الامور ممكنة .. و الله يكتب لك اللي فيه خير بكل الاحوال .. و اذا عندك اي استفسار او سؤال , لا يردك الا الكيبورد .. و بالتوفيق ..

السلام عليكم ورحمه الله

حقيقه جهود تشكر عليها اخوي chemist والله يجزاك الف خير ويوفقك بدراستك يارب..

انا بصراحه اخوي مبتعث في كندا وصارلي تقريبا سنه ادرس لغه ولا ارتحت في البلد بشكل العام معا ان الناس طيبيين هنا ومتعاونيين جدن والبلد امان ونظام بس انا جت في بالي فكره تحويل الدراسه الى الامارات معا اني توني شفت الرد

تبعك انه لا يسمح النظام بتحويل من امريكا الى دوله عربيه واتوقع النظام يشمل كندا فأنا بحاول اني احول بعثتي بكل الطرق بس بما انك تدرس بالامارات حبيت اسألك عن الوضع العام بالأمارات بالنسبه للدراسه فيها وقوه الجامعات اللي فيها

بما ان تخصصي اداره اعمال وش تنصحني بالجامعه الامريكييه بدبي او جامعه الشارقه وكم رواتب الطلاب السعوديين المبتعثين وهل تكفي لأمور المعيشه في البلد واسف لأن اعتقد بعض الاستفسارات تمت الاجابه عليها مسبقا لاكن اني تميت

اقرى بموضوعك لين وصلت الصفحه العاشره وتعلمت منك اشياء كثيره كانت تخفى عني وحبيت اني اشرح لك وضعي الخاص ومانتستغني عن نصايحك طال عمرك وجزاك الله الف خير على كل حال.

وعليكم السلام و رحمة الله و بركاتهـ ..

ابشر بالاجابة على كل استفساراتك ..

بما ان مجالك ادارة اعمال .. أنصحك بجامعة الشارقة أو الجامعة الامريكية في الشارقة و ما فيه شيء معترف فيه اسمه امريكية دبي ...

راتب الطالب المبتعث = 4420 درهم اماراتي .. يعني 1200 دولار امريكي .. و هي كاااافية للطالب اللي جاي يدرس و العكس صحيح

الوضع العام سهل للتأقلم جداً و الطلبة جادين بدراستهم لأن التعليم هنا لكافة الطلبة ليس مجانياً ..

الملحقية متعاونة جداً لأن عدد الطلبة معقول ( متوسط ) .. و خدماتهم ممتازة جداً و يقدرون يفيدونك بشكل كبير

اذا عندك استفسار محدد و ماتبي تبحث بالردود .. يا ليت تكتبه بصيغة سؤال أو أسئلة و أبشر بالردود .. و لاتنسانا بس من دعواتك .. و الف يا هلا

جزاك الله الف خير ياخوي chemist والله يجعله في ميزان حسناتك ويوفقك بدراستك عندي استفسارين اخيرن اذا ماعليك امر:-

الأول كيف من ناحيه السكن بالشارقه هل يوجد سكن قريب من الجامعات المذكوره وهل يختلف سعر السكن على حسب بعده وقربه من الجامعات؟

الثانيه ماذا عن جامعه الشارقه والجامعه الامريكييه كم معدل الايلس المطلوب لدخول الجامعه واي مستوى فيهم افضل كقوه شهاده وصعوبه في الدراسه؟

وجزاك الله الف خير

اخوك بدر

سؤال لا تضحكون علي او تعتبروا السؤال غبي

في الامارات تخصص التحقيق في الجرائم موجود صح بس للرجال و لا في نساء يدرسون هالتخصص؟؟