اي سؤال عندك (اطرحه هنا) المقابل (دعوة بالغيب) ..

اخوي خبير كندي الله يوفقك دنيا وآخرة
قريت تقريباً 90 صفحة والحمدلله حصلت على معلومات قيمة والفضل بعد الله لك الله يجعلها في موازين حسناتك وعندي استفسارت وياليت تجاوبني عليها لو تكرمت علي
1- زوجتي انقبلت في المرحلة الثامنة تخصصها للبكالوريوس أقتصاد منزلي وتربية فنية وقدمت على ماستر في العلوم الصحية لانها تبغى قسم تغذية مادري هذا القسم في موجود في جامعة فكتوريا ؟
2-الملتقيات راح اتكون في يوم 25 ذو الحجة ولمدة ثلاث ايام هل تنصحني اقوم بإجراءات الفيزا آلان علماً بانني قمت بمراسلة أخ في كندا وان شاءلله راح يجيب لي قبول في معهد كنق جورج خلال هذي الايام بحيث أننا ندرس فيه شهرين او شهر وبعدين ااحول لمعهد اليوفيك لان زوجتي صفر بالانقلش هل تنصحني بهذا ؟ وهل صحيح الوزارة هي التي تقوم بجلب قبول معهد ام انا المبتعث هو ن يقوم بذلك لاني ان ان شاءلله راح اجيب قبول لي ولها
3- معدل زوجتي 3.90 من 5 هل ممكن يكون عائق لها في التقديم للجامعات
4- انا معلم لغة انجليزية وسأذهب مع زوجتي كمرافق وارغب بإكمال دراسة الماستر في نفس التخصص وفي نفس جامعة فكتوريا برأئك ماهو التخصص المطلوب من الوزارة والمتوفر في جامعة فكتوريا علماً بأن معدلي للبكالوريوس (مقبول) بمعنى هل ممكن الجامعات ترفضني بسبب ضعف معدلي
5-في حالة قبولي في الجامعة ماهو الإجراء الصحيح الذي يجب علي اتباعه بحيث استطيع الحصول على اجازة دراسية من عملي لانني سوف اقدم أجازة استثنائية لمدة 4سنوات هل بإمكاني تحويلها الى اجازة دراسية فيما بعد؟
6- ذكرت في احد ردودك بانه لايمكن لزوج ان يلتحق بالبعثة حتى يتم أحضار مرافق اخر لزوجته طيب مالحل بوجهة نظرك هل ابقى مرافق حتى انتهي من دراستي للماجستير وهل هناك فرق بين التحاقك بالبعثة وبين المرافق غير زيادة المكافأة ؟
اثقلت عليك بالاسئلة بارك الله فيك ولكن يعلم الله انه جميعها مهمة بالنسبة لي

ياشيخه ان شاء الله تستفيدي .. وياك يارب

بيردون عليك بس عطيهم شوية وقت لاتزعجيهم بايميل ثاني ..

بالتوفيق ..

الجميع ان شاء الله .. الحمدالله اهم شي الفائده

1- بحثت بشكل سريع جدا في الموقع وطلع معاي فيه التغذيه بس ماهي عامه يعني مختص بالسكر مثلا وهذا رابط يوضح لك لو تقرا شوي :
Search | Victoria University | Melbourne Australia
لكن سويت بحث سريع في جامعة البرتا مثلا وطلع لي التخصص بالضبط زي مااطلبت :
Nutrition - University of Alberta

2- ابجاوب ع الي فهمته انا واذا ماعجبك الرد وضح لي .. الفيزا ع حسب موعد سفرك يعني حط لك تقريبا شهرين حق الفيزا واحسب وقتك وشوف الوقت المناسب للتقديم
بالنسبه لمستوى زوجتك لو تحت الصفر اذا هي جاده وبتذاكر يوميا دخلها معهد جامعي من اول ساعه لها بكندا .. لاتضيع وقت ابدا ابدا ( لانه لو تنتقل لمعهد جامعه بعد كم شهر بتبدا من الصفر )
الوزاره ماتدري عنك ابد بالقبولات دبر عمرك بالمختصر

3- معدل زوجتك قريب للمطلوب لكن لو تدعمها بشهادات خبره راح تكون فرصتها كبيره جدا .. لكن بصوره عامه المعدل مهم جدا بس اذا خبرتها تغطي كذا سنه وقويه راح تمشي امورها بعد ماتراسل الدكاتره بشكل شخصي ويتم الاتفاق بينكم وهو يطلب من القسم قبول هالمتقدم

4- الجامعات دائما تطلب 4 من 5 كحد ادنى .. لكن الخبره دائما تكون مطلوبه بشكل كبير ( خصوصا لاوصلت بتراسل دكاتره وبتعلمهم انك مبتعث ولاتحتاج منهم راتب والعكس رايح تدفع لو يبون مع الخبره رايح تفرق )
خصوصا لو اكملت جميع المتطلبات ماعدا المعدل..

5- كمدرس تقدر تحولها لاجازه براتب لكن اذا نسبتك غير جيده بما فيه الكفايه رايحين يعطونك اجازه بدون راتب ( راجع الجهه المختصه بالمعلميين رايحين يعطونك نقاطهم ولاشي يخلو من الواسطه )

6- العكس يكون افضل لك انك مرافق وتدرس الملحقيه ماراح تنشب فيك كل شوي ويعقدونها عليك حتى تقدر تدرس بجامعه غير معترف فيها لكن الوهقه ( المدام اذا مامشت زين او طفشت ,,, الخ .. رايح تضطر تكون معها اجباري .. لكن في حالة شفت ماهيب ماشيه زين انت قدم ع البعثه وخلها مرافقه !! ) الفرق الوحيد بيكون لك المكافئه تقريبا 1500 دولار وهي 2700.

ولايهمك تستاهل .. بالتوفيق ..

لو سمحت ابي اسال عن المعاهد الاكاديميه الموجوده في فانكوفر
وهل تنفع للمستويات المبتدئه؟؟

وبعد سمعت عن معهد قلوبل فيلج تجاري مادري كيف مستواه؟؟

وجزاك الله خير على ماتبذل من جهد

- - - مشاركة محدثة - - -

لو سمحت ابي اسال عن المعاهد الاكاديميه الموجوده في فانكوفر
وهل تنفع للمستويات المبتدئه؟؟

وبعد سمعت عن معهد قلوبل فيلج تجاري مادري كيف مستواه؟؟

وجزاك الله خير على ماتبذل من جهد

السلااام عليكممم
بغيت اسألكك وياليت تفيديني لأني حايسسسس جدآ
انا بسآفر لـ كندا الشهر الجاي واحد يقربلي قدملي ع معهد وقبلني ورسلولي ورقه الموافقه ، والفيزآ طلعت ، يعني اوراقي جاهزهه
طبعآ بطلع ع حسابي الخاص ، جيت اقدم ع الملحقيه مكتوب لازم الموافقه من الوزآرهه ، دخلت ع موقع الوزآره وطالبين موآفقه من جامعه موصى بها، وانا باقي بأدخل المعهد ؟؟ وطالبين قبول اللغه < كيف اجيبها !!!؟؟ والبآقي طلبآت موجودهه
ياليت تفيديني ي خبيرر ، ايش اسوي بالضبط ، حتى لو تعطيني ايميلك عشآن تعلمني الطريقه
وشكرآآآ مقدمآ

المعاهد الاكاديميه في فانكوفر الي تتبع الجامعه

جامعة برتش كولمبيا وسيمون فريزر وفيه كليات كثيره زي كنق جورج او كنديان كولج

حتى لو مبتدئه ادخلي اكاديمي اذا انتي بتدرسي وبتذاكري 5 ايام بالاسبوع 3 ساعات يوميا ( مضمون تمشي )

قلوبل فليج يعتبر افضل المعاهد التجاريه سمعته ممتازه لكن يبقى تجاري سياحي !!


وياك يارب .. بالتوفيق ..

وعليكم السلام ورحمة الله وبركاته ..

طيب الي فهمته من كلامك انك تبي قبول لغه من جامعه معترف بها من قبل الوزاره ..؟

اذا الي فهمته صح الموضوع بسيط جدا .. انت جاي مثلا ع تورونتو .. عندك كذا جامعه معترف فيها مثل يورك وجامعة تورونتو روح لهم وقولهم ابي ادرس عندكم

رايحين يعطونك القبول بمبلغ مادي مايتعدى ( 200 دولار ) وارسله سواء للوزاره او الملحقيه

اذا انت تبيه الان خلي الي يقرب لك يطلع لاي جامعه جنبه معترف فيها ويسجلك زي ماسجلك في المعهد العادي

واذا قريبك صرفك روح لاقرب مكتب سياحه يوفر لك قبول اللغه

انا خليني اخر خيار لك ماني فاضي لكن اذا مالك الا الله ثم انا ابجيبه لك من الجامعه الي انا فيها ( او بعلمك طريقته من موقعهم وجيبه بنفسك اذا عندك شوية انقلش )

بالتوفيق ..

مشكككورر اخوي خبيرر
يعني الحين اجيب قبول لغه من جامعه ، وقبول نفس الجامعه < عشان ااسجل في الملحقيه

بتعبك معآي جزآك الله خيرر ، بس هالنظظام نازل في رمضان انو لازم الموافقه من الوزارهه ..

عفوا اخوي الي بالاحمر مافهمته زين

هو قبول واحد نسخه تقدمها للوزاره ونسخه للملحقيه فقط .. ان شاء الله الان اوضح ؟

ولايهمك والله مارضيت اطلع لانه باين عليك حايس فقلت اساعدك .. عموما لو شي مافهمته اكتبه وبرد عليك باقرب وقت ان شاء الله

باالتوفيق ..

شروط ومتطلبات الحصول على الموافقة على الدراسة على الحساب الخاص:

• صورة من بطاقة الهوية الوطنية للطلاب وصورة من بطاقة الهوية الوطنية أو سجل الأسرة للطالبات.
• صورة الجواز "ساري المفعول".
• صورة من المؤهل الدراسي الذي يسبق الدرجة التي يرغب الطالب دراستها.
• صورة من قبول اللغة.
• صورة من القبول الجامعي في جامعة موصى بها في الدرجة والتخصص.
• صورة من التأشيرة الدراسية ولا تقبل التأشيرات السياحية.
• صورة من نموذج (I-20) للطلبة الراغبين بالدراسة في أمريكا، ونموذج (COE) لراغبي الدراسة في استراليا، ونموذج (CAS number) لراغبي الدراسة في بريطانيا.
• نتيجة الفحص الطبي من مستشفى حكومي. ولتحميل نموذج الفحص الطبي اضغط هنا.
• في حال كون المتقدم موظف حكومي يجب إرفاق إجازة دراسية تغطي مدة الدراسة
• معادلة الشهادات السابقة من جهة الاختصاص إذا كانت صادرة من مؤسسة تعليمية غير سعودية.
• وجود موافقة من ولي أمر الطالبة بالدراسة في الخارج وتحديد أسم المحرم المرافق لمن ترغب الالتحاق بعضوية البعثة التعليمية. ولتحميل نموذج الموافقة إضغط هنا.
• التوقيع على التعهدات والإقرارات اللازمة.
• الموافقة على الدراسة على الحساب الخاص لا تعني الموافقة على الإلحاق بعضوية البعثة التعليمية، وللإلحاق بالبعثة يجب على الطالب استيفاء الشروط الواردة بالأمر السامي الكريم رقم 7/ب/5601 وتاريخ 22/4/1428 هـ.

هذي شروط الوزآره انا عندي مشكله فقره 4 و 5 > طالبين قبول لغه وقبول جامعه .. > ياليت تفهمني ، اجيبها كلها من نفس الجامعه ولا كيف!
وعايدي اطلبها وانا باقي مادرست ف المعهد يعني عادي تقبلني الجامعه وانا ادرس بالمعهد ولا باقي

الله يوفقكك دنيآ وآخرهه اخوي خبيرر بس ابغى اخلص موافقه الوزارهه عشان اذا وصلت كندا ان شاء الله افتح ملف واسجل بالملحقيه بدري بدري < ع فكرهه فتح الملف والملحقيه ماعرفتها الا منك الله يجزآك بالجنه ..