اي سؤال عندك (اطرحه هنا) المقابل (دعوة بالغيب) ..

الله يجزاك خير على كل هالمعلومات الي تقدمها . .

اخوي انا في حيره من امري بين مدن كندا وبصراحه افتر راسي من كثر ما اقراء وكل ما اقول خلاص وصلت للمدينة الي ابيها ومميزاتها تكون مناسبة لنا كعائله الا ويطلع لي بعض المواضيع الي تذم المدينة يعني الآراء تختلف كثيررر وانا مرره تعبت من كثر ما اقراء وبما انك خبير بكندا ياريت تساعدني وترشح لي مدينة مناسبة للعائلة مع ذكر الايجابيات والسلبيات . .

فكرت في فانكوفر مارأيك فيها؟؟
وبما ان عندي اطفال في سن دخول المدرسة كيف راح يكون وضعهم هناك بالنسبة لدراسة؟؟ هل توجد مدارس سعودية؟؟ كيف اهل المدينة ؟؟ بنسبة للحجاب هل النقاب منتشر ولا لا؟؟ هل يوجد مضايقات للمتنقبات ولا الوضع عادي؟؟ كم متوسط الايجارات؟؟ ايش الاماكن الي تنصح بالسكن فيها؟؟ واخيراً وش رأيك في معهد UBC سمعته حلووة بس يقولوا يعيبة طول المدة بس ماعتقد انها مشكلة مارأيك؟؟

كثرت عليك بالأسئلة بس بجد مرررره محتارره : (

وش الي تنصحني فيه اخوووي بليززز افيدني

جزاك الله خير اخوي خبير كندي
واللى له اخوان مثلك اكيد بعد توفيق الله ما يفشل وعلى قولة احد الاخوان (نزار باهبري ) ( احنا ننجح ببعض).
ببحث موقع معهد جلوبل فلج ( شورك وهداية الله ) . تقريبا الشقق المفروشة اسعارها كم ؟
اشكرك واتمنى لك التوفيق .

وعليكم السلام ورحمة الله وبركاته ..

1- غالبا يطلبون منك كشف حساب لاخر 6 شهور ( اذا حطيت هالمبلغ بنفس اليوم او الاسبوع وطلعت الكشف وقبله كان الحساب فاضي رايحين يكتشفو هالشي ) لكن جرب وان شاء الله تتوفق ..

2-تقدر تقدم ع تصريح عمل في حالة انك طالب وفيها احتمال ترفض ( لكن المضمون تقدر تشتغل من تحت الطاوله وهالشي كثير يسونه لكن الراتب يكون اقل ) خصوصا المحلات العربيه
اذكر اني اشتغلت بسوبرماركت عربي كذا شهر من تحت الطاوله لكن نقص علي بالساعه دولاين من الحد الادنى للرواتب ( الطرفين مستفيده ) كان تركيزي ع اللغه اكثر من الماده ..

3-الفيزا تختلف من بلد لبلد .. اذا من اليمن بتقدم لازم ترسلها ع ابو ظبي وهالشي بيطول المده معك .. عطها شهرين الى ثلاثه واذا المكان الي انت فيه متواجده السفاره الكنديه قول شهرين
لكن تختلف من شخص لاخر ( انا احد الناس الي ماخذت مني اكثر من 4 اسابيع وفيه ناس يجلسون بالشهور ) ..

بالوفيق ..

ههههه واضح الحوسه من كتابتك .. ولايهمك هدي اعصابك وروقي ومالك انتي وعيالك باذن الله ترتب اموركم المهم بطلبك نقطه وحده .. ارسي ع بر .. اتبعي كلام شخص واحد عشان ماتضيعي بالردود لانه طبيعي كل شخص بيرد عليك من باب خبرته الشخصيه او سمع عن طريق احد .. بهالحاله راح تنعدم الرؤيه عندك ( انا كنت بمكانك بيوم من الايام وبما اني كنت بالحالي قررت ماسئل احد ولو امر بسيط فقررت اجرب .. فعلا طحت بمواقف كثيير غلطت فيها لكن تعلمت اكثر من الي غلطته ) ..

انتي لاجيتي تختاري مدينه فكري بنفسك وباطفالك .. ماتبي مدينه صغيره الطفش يحتويكم .. وبنفس الوقت المدينه الكبيره بتعطيك فرص اكبر للخدمات سواء من مدرسه سعوديه من عوائل زي وضعك وبنفس الوقت فيها نفس حلو لك ولاطفالك الله يحفظهم .. ولاتنسي الجو بيكون مهم لاطفالك ..

يعني انا ابقولك اختاري فانكوفر لتوفر كل شي فيها ومنها الجو المتاسب .. صحيح اغلى نوعا ما .. لكن الغلا بالطلعات والجيات فقط .. يعني المدن الصغيره رايحه تجلسك في البيت اكثر فراح تصرفي اقل لكن هالشي انتي رايحه تتحكمي فيه ع حسب ميزانيتك .. عشان كذا اقولك ركزي ع المدن الكبيره والي فيها النادي السعودي نشيط ( لان هالشي غالبا يدل ع كثرة العوائل السعوديه ) .. يعني زي فانكوفر . تورنتو . ادمنتن . كالقري . وفيه كثير

بما انك سئلتي عن فانكوفر فماقدر اقول الا انه الخيار المناسب للعائله والخيار الاسوء للعزاب .. ممتازه للاطفال بحكم انه الجاليه السعوديه كبيره ورايحه يفيدونك بموضوع الدراسه لانه فيه مدارس اسلاميه كثير وهذا الشي رسساله وحده للنادي السعودي في فانكوفر بيعطونك عناوين هالمدارس والي السعوديين كلهم فيها ولو تقري بردودي بتلاقي اشياء تفيدك بهالموضوع وبنفس الوقت يقدرون يدرسون بالمدارس الكنديه واذا هم تحت 7 سنوات بكل شاع بتلاقي الحاضنات وفيه عربيات ومسلمات كثير .. يعني خياراتك بتكون اكبر ماراح تضطري لشي لكثرة الخيارات ..

المدينه جميله ( مافيه مكان يخلو من العيوب حتى بديرتنا ) لكن محد يتعرض لاحد شعب جدا مسالم .. شعب مبتسم .. باختصار عنصريتنا كسعوديين اكثر من اي عنصريه شفتها بحياتي .. فتطمني محد راح يتكلم ع نقابك العكس احترام كبير للديانات بس موقفك بيكون محرج شوي بالجوازات عشان يطابقون صورة الجواز حقك .. خصوصا اني دائما انصح بالحجاب الاسلامي افضل بكثير مو خوف من شي .. بس يعطي راحه نفسيه ع التعامل .. لانه طبيعي تجيك نظرات شي غريب عليهم ( تخيلي اجنبيه تجي السعوديه بملابسها العاري وش تتوقعي يصير محد بيناظر !!! ؟ ) لكن تطمني محد بيتعرض لك نهائيا باذن الله .. النقاب موجود لكن مو منتشر

الايجارات ع حسب المكان ابعدي عن وسط المدينه شوووي بتقل الايجارات ع حسب كم غرفه يعني مثلا لو تبي غرفتين وصاله وحمامين ومطبخ ومستوع بسيط بتكون من 1000-1500 ( برا الداون تاون بقليل ) بنص الدوان تاون تقريبا يرتفع نص المبلغ ..

والله انا من خارج فانكوفر لكن ع معرفتي العامه فيها اسكني بالاماكن الي تكون قريبه من محطات القطار افضل لك بكثير ..

سمعته جدا ممتازه .. مافيه تطويل كلها كورسات ع شهرين او اربعه وهي بالاخير نفسها .. لكن خذي الي يصلح لك لو تطفشي من الاترام الطويله خذي ابو شهرين .. ( بالاخير زيد اخو عبيد ) وانتي رايحه تدرسي انقلش سنه ونص باي مكان وباي معهد بكندا .. لكن انصحك فيه بقوه ..

ان شاء الله اني افدتك لو بشي بسيط واي استفسار حطيه .. بس نصيحه صغيره اقري الموضوع من اوله فيه اشياء بتفيدك كثير خصوصا اغلبه عن فانكوفر ..

بالتوفيق يارب ..

وياك اخوي تستاهل ..

الله يحفظك مانرجي من هالخدمه الا دعوه صالحه بالغيب الله ييسر امورنا جميع .. اللهم امين

قلوبل فليج كمبنى وكلاسات ماهو بالشي الراقي الكثير لكن تدريسهم اعتبره الافضل بين معهاهد التجاريه .. الله يوفقك

الشقق المفروشه بالشهر غرفه وحده 1200-1500 ( تزيد وتنقص ع حسب الموقع والفخامه ) بس هذي حدودها وممكن اقل ب عطيتك حد اعلى عشان ترتب حسبتك

بالتوفيق ..

الله يسهل امورك ان شاء الله ..
العفو بالخدمه حاضر ..

بالتوفيق ..

هههههههه ايه والله اني محتاسسه كثييرر

اولاً: يسسلمووو على هالمعلومات والله يجزاك كل خيييرر ويوفقك ويحقق لك ماتتمنى قادر ياكريم

ثانياً: ان الله اراد بتكون بعثتي لمقاطعة برتش كولمبيا يـ فانكوفر يـ فكتوريا والاغلب فانكوفر احس اني ارتحت لها كثير وكونت عنها صوره حلووه ان شاء الله ما اروح هناك وانصدم ههههههه اممممم ايه صح حابه استفسر عن منطقة (( نانيمو )) هل هي قريبه من فانكوفر ؟؟ هل تناسب العائلة ؟؟ اي معلومه عندك عن هالمنطقه اسدحها هوون لاهنت *_*

ثالثاً: ممكن اعرف متوسط الايجارات في فانكوفر ؟؟

رابعاُ: الله يجزاك الف خيير بجد الي يساعدو الناس مثلك بدون اي مقابل بدؤؤ ينقرضووا ما اقوول غير الله يحفظك لعينن ترجيك ويحميك من كل شر انت وكل شخص يعمل الخير ويحقق لكم ماتتمنوو يارب

اولا .. الله يسلمك ويحفظك لعيالك ..

ثالنيا .. انسي ننايمو كاني ماقريتها ( مدينه شارع واحد ومعدومة الامان ) عندي معلومات كثير بس حرام تروحي لها كعائله بتتعبي وبيتعبون صغارك كثير عشان كذا انصحك تقفلي الموضوع نهائيا .. اتفقنا ؟ خليك ع فانكوفر والقلب داعليلك حتى لو فكتوريا ارحم من ننايمو بكثير لكن اصر ع فانكوفر كعائله .. صحيح بالبدايه تخوف مدينه كبيره ويالله وش اسوي .. بس عطي نفسك كم اسبوع وبتحبينها ..

ثالثا .. حددي لي بس كم غرفه تبي وبعطيك موقع يوريك الاسعار كلها بالتفصيل الممل الي داخل الدوان تاون والي برا ..

رابعا .. اااخ بس وشلون تريحي قلبي بهالكلام الطيب .. بس طلبتك في الي خلقك .. لاصليتي فجر دعوه من قلب والله العالم اني بحاجتها بالحيل ..

الله ييسر امورك ..

بالتوفيق ..

اخوي خبير الله يجزاك خير على ماتقوم به من خدمه لطلاب المبتعثين
لدي سؤال بخصوص جامعة فتكوريا هل يوجد لديهم تخصص مناهج وطرق تدريس اللغة الانجليزية وهل هذا التخصص هو مثله مثل تخصص tesol وtesl وtefl ام هناك فرق بينها لاني ابغى اتخصص في مناهج طرق التدريس ولا أعلم عن جامعة فكتوريا هل فيها هذا التخصص ؟
والله يجزاك عني خير

- - - مشاركة محدثة - - -

اخوي خبير الله يجزاك خير على ماتقوم به من خدمه لطلاب المبتعثين
لدي سؤال بخصوص جامعة فتكوريا هل يوجد لديهم تخصص مناهج وطرق تدريس اللغة الانجليزية وهل هذا التخصص هو مثله مثل تخصص tesol وtesl وtefl ام هناك فرق بينها لاني ابغى اتخصص في مناهج طرق التدريس ولا أعلم عن جامعة فكتوريا هل فيها هذا التخصص ؟
والله يجزاك عني خير

والله لو تعطيني اسم التخصص بالانقلش تسويلي خير .. عجزت لاترجمه وانا اخوك .. مابي تترجمه بمترجم .. ابي اسم التخصص نفسه الله يحفظك ..

بالتوفيق ..