اي سؤال عندك (اطرحه هنا) المقابل (دعوة بالغيب) ..

معليش اخوي مافهمت كلامك .. ياليت توضح ( لكن بالمختصر المفيد اللي بيقولونه لك هو الصح )

بالتوفيق ...

السلام عليكم....
بإختصار شديد ياأخي انا ناوي انو أطور لغتي الانجليزية في كندا انشاء الله ، علماً بأنو مستواي (Pre Intermediate) اي تقريبا بين 30% و 40% من اللغة حيث اني كنت في المستوى التاسع من مجموع19 مستوى في المعهد (بريتش كاونسل في جدة).....
**أقسم لك بالله اني قرأت الصفحات ال63 السابقه كاملة لمدة اسبوع كامل لكي استفيد وأعلم ان بعض الاسئلة التالية معادة ولكن لاختلاف حالتي عن البعض من حيث اكمال الدراسة في الجامعه حيث اني متم للبكالوريا ولا انوي حاليا التقدم للماستر وانما هدفي الاول هو اللغة ....
الاسئلة:
1-برأيك ماهو الافضل الدراسة في المعاهد الاكاديمية او التجارية خصوصا اني لاانوي الالتحاق حاليا باحد الجامعات وانما هدفي الاساسي هو تقوية اللغة والحصول على التوفل او الايلتس(أعلم تمام العلم انك تفضل الاكاديمية ولكن بعضها مثل الـ ubc فترة الليفل فيها طويلة 4 اشهر ففي حالة الاخفاق يعاد الليفل كاملا وبالتالي يصبح المجموع 8 اشهر وهي فترة طويله جدا لشخص يدرس على حسابه الخاص)؟؟
2-برايك ماهي افضل هذه المعاهد (النوع الذي اخترته) من حيث القوة والسعر (لاني ادرس على حسابي الخاص) ؟؟
3-انا لدي معاناة كبيرة مع الجرامر ماهي الطريقة الافضل لتحسين مستواي فيها؟؟
4-ماهي افضل المدن الكندية للدراسة من حيث الجو العام واسعار المعيشه؟؟
5-برأيك هل فترة 8اشهر كافية للحصول على التوفل (اذا كانت الاجابة لا ارجو التكرم بوضع الفترة المناسبة للطالب الذي يعرف تماما ماهو سبب قدومه لكندا ويعلم معاناة اهله في توفير مصروف دراسته )؟؟
6-ماهو افضل انواع السكن للطالب (العائلة لفترة محددة يعني شهرين لكي يستطيع نوعا ما التعود على الحديث ومن ثم سكن اخر ام السكن مع العائلة طول مدة الدراسة)؟؟
7-كم يبلغ متوسط صرفية الطالب في الشهر باستثناء المعهد (الشخص المتوسط الصرفية)؟؟

اســــــــــــف جدا لكثرة الاسئلة ولكن كلي امل في ان تساعدني ماجورا مشكورا... وفقـــــــــــــــك اللــــــه؛؛؛؛ وأقر عينك برؤية والدتك بأحسن حال وأقر عينها برؤيتك في احسن حال.....

وعليكم السلام ورحمة الله وبركاته ..

ممتن لك لقرائة الموضوع والردود ( وهالشي ان شاء الله عطاك شي تحتاجه ) وانا ماطلب من الجميع القرائه الا لاني متاكد من تكرار الاسئله ويتشتت الموضوع ..

طيب اخوي انا كلامي رايح يكون مبني على انك انسان تبي الدراسه الجديه وهدفك التوفل .. :

1- الافضل طبعا بالمعاهد الاكاديميه والسبب الرئيسي انهم يركزون عليك في الاقرمر والكلمات الاكاديميه الي رايحه تفيدك في اختبارات مهارات اللغه .. على سبيل المثال جامعة برتش كولمبيا اللي انت تفضلت فيها صحيح 4 شهور وطويله ( لكن ليه اول خيار عطيتني اياه الفشل !!) انت لو تداوم يوميا وتذاكر 3 ساعات اضمن لك النجاح .. لكن فيه جامعات ثانيه تكون على شهرين المستوى الواحد ومنهم ( جامعة سيمون فريزر في فانكوفر + جامعة البرتا في ادمنتن ) طبعا الجامعات كثيره لكن عطيتك خيارين القريبه لذهني .. وبالمناسبه اللي بتاخذه في شهرين هو نفس اللي بتاخذه في 4 شهور .. ولو انت مجتهد ثق تماما ان الرسوب مابيكون احد خياراتك ( لنفرض جدلا انك رسبت في كورس لكن قيم نفسك الفائده الي اخذتها بالفتره الماضيه ) يعني ممكن ترسب لكن فائدتك بتكون اخذتها بشكل ممتاز والموضوع انقلش يعني كل يوم بتتعلم شي جديد لكن زي ماذكرت لك انسى الرسوب في حالة الاجتهاد..

2- المعاهد رايحه تعطيك مايقارب 30 % ومن معهد الى معهد تختلف ياتكون اكاديميه او عامه .. لكن التحق بمعهد جامعي افضل لك وركز على المدينه اولا وبعدين نتكلم عن الجامعه واذا ناوي على فانكوفر فاني اشوف اقرب خيار لك سيمون فريزر في حالة انك تبي شهرين فقط للمستوى الواحد ..

3- افضل طريقه للقرمر انك تكتب بشكل مكثف وتخلي المدرس يصحح لك الي كتبته ( لكن الاهم من هذي الخطوه انك تراجع الاخطاء وتتجنبها بالمرات الجايه طريقه توصلك للنجاح بالاقرمر في اسابيع قليله )..

4- الاجواء في مقاطعة برتش كولمبيا جيده مقارنه بالمقاطعات الاخرى .. لكن فانكوفر تعتمد على يدك اذا انت تصرف كثير فالمدينه بتجبرك على الصرف من جمالها .. واذا فكرت في البرتا فهي ممتازه دراسيا بتطورك بشكل اسرع لكن الجو متعب جدا جدا جدا ..

5- تكون كافيه بوجهة نظري الخاصه بحكم ان عندك لغه مبدئيه ( لكن يعتمد بشكل كبير على اجتهادك وجديتك .. لو كنت فعلا جاد اقولك ايه نعم كافيه )..

6- هذي نقطه حساسه .. يعني الافضل انك تختلط بالناس سواء بالعائله او غرفه في عزبه ( لكن ممكن الجانب السلبي يكون الازعاج فانا شخصيا سكنت عند عائله فتره طويله لكن مارجع الا الليل اذاكر في الجامعه )..
فيفضل تاخذ عائله لاول شهر وتقيس الوضع بمنظورك الخاص ..

7- اذا مع السكن ماراح يقل من 1700-2000 دولار شهريا .. اذا بدون السكن فقط مصاريف وفواتير تقريبا 800-1200 دولار للشهر ( خصوصا اول شهر تحتاج مبلغ كبير نوعا ما ترتب فيه امورك والين تعرف المدينه زين )

ولايهمك وانا اخوك دامك دعيت هالدعوه تستاهل هالرد المفصل واي خدمه تامر امر لاني فعلا بحاجة هذي الدعوه ويكاد هالموضوع فاتحه فقط لأن يرأف الله بحالي ويقبل دعاء احدكم .. شكرا

بالتوفيق اخوي ..

ادري كتبته من العجله ، جاتني هذي الرساله عنوان رسالتي اللي ارسلتها بعدها جاني كلمه Confirmation‏

بعدين محتوى الرساله ، يقولون فيه لازم تنتظر وحاطين المده لكل نوع من الفيزا .

خبير كندي

اشكرك من كل قلبي على سعة صدرك وردك المفصل واسأل الله ان يجعله في موازين حسناتك ، والله يااخي وما حلفتني اني دعيت ان الله يلم شملك بامك على خير والشيخ السديس الله يحفظه يدعي في ليلة 27 رمضان اسال الله ان يتقبل مني ومنك ومن جميع المسلمين.....
1-بالنسبة للمعاهد الاكاديمية فانا متفق معاك في رايك... ولكن لو تكرمت علي بوضع روابط الجامعتين اللي ذكرتهم فضلا لا امرا...
2-لا ادري ماذا تقصد بان الجو صعب جدا في البرتا ... هل قصدت المناخ ام التعامل ام الترفيه ام ماذا؟؟
3-لا ادري ان كانت لديك فكرة عن ولاية نيوبرنزويك لانو احد الاعضاء الكرام نصحني بها لاعتدال اسعارها ولان جميع مدنها ناطقة بالانجليزية وبالتحديد معهد سانت جون التابع لجامعة الولاية؟؟
4-هل هناك فرق بين معهد الـ ubc والمعاهد التي ذكرتها لاحقا من ناحية جودة الدراسة وقوتها لان ذلك يهمني كثيرا؟؟

جزاك الله كل خير ، واسال الله ان ينزل الصبر والطمأنينه على قلبك حتى تجتمع بوالدتك على خير عاجلاً غير اجل بإذن الله.... ولك خالص مودتــــــي ؛؛؛؛

طيب ممتاز انت شف نوع الفيزا حقك كم المده اللي هم محددينها .. لو تجاوزت وباقي مارسلوها لك ارجع ارسلهم مرا ثانيه ..

بالتوفيق ..

ولايهمك تستاهل كل خير ان شاء الله .. اللهم امين والله يسمع منك ان شاء الله

1- لك ماطلبت :
** SFU.ca سيمون فريزي فانكوفر
** University of Alberta - Edmonton, Alberta, Canada البرتا في ادمنتن

2- الجو من ناحية الترفيه والبروده في الشتاء.

3- اعرفها واسمع عنها لكن ماراح افيدك عنها الكثير كمستوى تعليمي لانها لاتضاهي الجامعات المذكوره لك سابقا( لكن كمدينه ومعيشه فاسعارها ممتازه وهادئه وصغيره جدا )

4- الفروق في المعاهد الاكاديميه لن تكون جدا كبيره ( فهي فروق باستطاعتك انت التعايش معها وتجعلها لصالحك .. يعني مثلا في فانكوفر مافيه الفرق الكبير في سيمون فريز عن برتش كولمبيا لكن سمعة برتش كولمبيا اقوى بحكم تخصاصاتها الجامعيه وابحاثها العملاقه )

اللهم امين اللهم امين اللهم امين .. شكرا من القلب ..

بالتوفيق ..

الله يعطيك الف عافية ياخبير كندي....
بصراحة وصلت لقناعة انو ياإما حدرس في معهد ubc او في ولاية نيوبرنزويك وبناء على كلامك بانه في مافرق كبير بين المعاهد الاكاديمية وبما اني ارغب في دراسة اللغة فقط وليس اي تخصص اكاديمي فااعتقد انه قوة الجامعه غير مهمه خصوصا انه حتفرق معاي كثير من الناحية المادية الدراسة في نيوبرنزويك عنها في فانكوفر... هل تتفق معي ام انك ترى ان معهد ubc يستحق التضحية أكثر وستكون هناك فائدة اكبر و اوضح واسرع عند الدراسة فيه ؟؟؟؟؟....

جزاكـ الله كل خيــــر وحقق لك امانيـــكـ وفوق ماتتمنــــى....... وبالنسبه للدعاء فهذا والله اقل مايستحقه شخص مثلك يضحي بوقته في الغربه والدراسة لاجل اخوانه .... أشكـــــــــــرك؛؛؛

الله يعافيك ان شاء الله ..

اتفق معك رووح والله يسهل دروبك لكن استخير وماخاب من استخار .. لانه بصراحه الدراسه في المعاهد الجامعيه رايحه تعتمد بشكل كبير عليك وعلى اهتمامك..

بالتوفيق ..

ابي اعرف بس تاريخ يوم العيد