ماهي افضل معاهد جامعه او تجاري في فانكوفر او فكتوريا

أنا جربت ٣ معاهد بفكتوريا

اول شي معهد جامعة فكتوريا : أزبل شي صراحه وتضيع وقت طووويل ومافيه فايده فيه وبعض المدرسين فيهم عنصريه و نظرتهم لك أنت سعودي مو لازم تنجع بسهولة لازم تعيد الترم , لانهم عارفين انه وراك حكومه
تدفع لك وانه مدت اللغه عندك من سنه الى سنتين فايحسبوها ويوزنها لك , بعكس الياباني والصيني هذوله يعطوهم درجات بالكوم , لأانه كم شهر وراجعين
وعدت شكاوي قدمناها لي اداراة المعهد لكن بدون فائده , يقولو لك جرب الترم الجاي وأحنا مانحط لك نفس المدرس ! بدال لايحلو المشكله مع المدرس يبوك تكمل ترم ثاني معاهم
تجربتي خلال ٤ أترام كل ترم ٣ شهور
مميزاته :
لاشئ يذكر , غير بطاقه الجامعه يعطوك خصم من دومينز بيتزا
العيوب :
جاي في شمال المدينه , مافي جنبك ولاشي , والكفتريا الي فيه الله يديم النعمه
والمكتبه أسعارها خرافيه ومستغلين النقطه هذي لانها الوحيده
انته سعودي أنته كنز هذي فكرتهم


المعهد الثاني : جلوبال فيلج
أنا درست عند مدرسه أسمها ميلودي , بصراحه جدا" ممتازه وشرحها" جدا" رائع اتحسفت على الوقت الي ضيعته بمعهد جامعة فكتوريا
درست شهر واحد , كنت جاي من اجازه وباقي شهر على بداية الترم في فكتوريا فقررت أدخل المعهد بدال ما أقعد فاضي بدون دراسه , وأنصح بيه أذا بتكون عند ميلودي , لكن غيرها ماعندي علم صراحه
مميزات المعهد:
في قلب الداون تاون
العيوب :
مواقف مجايه مافيه
زحمه طلاب , والمعهد نوعا" ما مستهلك وديكورات والاداوت قديمه

المعهد الثالث : اللينغوا
بصراحه المعهد يعتبر جديد نوعا" ما , والمميز فيه مدرسين أثنين وأذا جيت فكتوريا لابد تسمع بيهم , الأاول أسمه مارك , وهذا يعطي دورة أيلتس مسائي , يومين في الأسبوع
والثاني : ستيفاني , بالكلمات لا أستطيع وصفها ( حلو التعبير ههه ) هذي متخصص أيلتس , بفضل الله عز وجل ثم هذي المدرسة مافي احد يدخل الكلاس عندها والا يجيب الدرجه المطلوبه في الأيلتس , تركيزها كله كيف تعدي في الأايلتس , وشرحها موبس كلام وخذ حل واجب ومن ذه الكلام الفاضي , بل تدريبات فعليه يوميه في الكلاس , وتركز على نقاط ضعفك وهي ماترتاح لين أنته تتحسن , ماشالله عليها , وكان من حظي انها درستني ٣ حصص وكانت جدا" جدا" مفيده
وأنشالله الشهر الجاي با أبداء ادرس عندها
درسة في المعهد هذا عند مارك من ٣ شهور
وأنشالله با أبداء من الشهر الجاي في اللنغوا مع ستيفاني ,
مميزات :
المعهد جديد يعني كل شي نظيف ولسا ماندهك مع الأستخدام , وفي قلب الدوان تاون , يعني جنبك كل شي مطاعم ومحلات
فيه أفضل مدرسين على مستوى فكتوريا مارك وستيفاني
مرونة الدوامات مع الطلاب المسلمين , يعني مثلا" الأان الدوام في رمضان غيرو الدوام من ٩ الصباح الى ٤ العصر خلو من ١الظهر الى ٥ العصر لجميع الطلاب سواءا" كنت مسلم أو لاء , يعني اجبرو الطلاب الاخرين على ادلوام هذا احتراما" للدين الأاسلامي
وهذي نقطه جدا" احترمتها فيهم

أرجو من كل شخص لقي انه ردي مفيد له يدعيلي انه أجيب الــ٧ في الأايلتس

اخوي بخصوص معهد الجامعه اختلف معك المدرسين والمنهج قوي صحيح شوي تشدد ولاكن احنا نحسبه عنصريه
بس الحقيقه معهد الجامعه يخليك تقرا وتكتب صح

معهد جلوبل من تجربة الشباب وضعه سيئ اسغلال السعودين بشكل واضح وطريقتهم غبيه يعتمدون علي الاوراق ومافي كتب المعهد حق تضيع وقت اللي
ايضا معهد جيوس سيئ السمعه
اما بنسبه النجوا فعلا في تعاون واضح من الادارة والمدرسين اللي ذكرتهم ممتازين كمان في مدرس اسمه كرج عندهم ممتاز الفروض علي الملحقيه تقيم المعاهد
والمعهد السي يوقفونه

أولا" تشكر اخي خالد على ردك , وبالعكس انا مقدر رائيك تماما" و أنا من الناس الي أفضل أسمع الرأي الاخر بكل صدر رحب .

وبالنسبه للي ذكرته عن معهد اليوفيك , لو تلاحظ انا قلت في ردي أنه بعض من المدرسين فيهم عنصريه , نفس جيري وأيريك وكم مدرس اخر لكن لا أحب اذكر اسمائهم لانهم مادرسوني وانا لا استطيع أبدي رائي في شخص ما درسني .
وأذا درست في اليوفيك أكيد بتعرف قصدي من الأسماء الأاخرى ,
ولكن يظل هناك مدرسين ممتازين ويتم تأسيسك بشكل جيد , نفس دونا و جين , وبرأئي هذول أفضل مدرسين في معهد اليوفيك , ودرست عندهم ليفل 330 ,

وأنا قدمت رأئي سابق بناءا" على دراسة 4 أترام في معهد اليوفيك , وعارف كل ألاعيبهم , مثلا" تدفع ال350 حق تسجيل الترم وتجي ظروف مايمديك تكمل مايرجعو الفلوس , اوكي هذي النقطه ممكن أتفق فيها معاهم , نقول هذا النظام ولازم نمشي عليه , طيب حولو المبلغ هذا للترم القادم , مثلا" في الصيف ماأقدر أدرس حولوه للترم الي بعده يقولو لك لاء لازم تدفع 350 مره أخرى , ع العلم أنه هذا النظام فقط على السعوددددين , الصينين والياباني يوقف ويغير ويقت مايبا ولا أعلم لماذا .
نجي للمدرسين , بالنسبه لي ايرك معروف عنصريته ضد الأاسلام , واذا أنته سعودي ماتنجح لو تاكل الارض , أحنا في كلاس 16 طالب من الترم السابق مانجحو الى 2 فقط و ال14 الباقين راسبين !! هل الغلط مننا ولا من المدرس ونفس الشي السويتش الأاخر لنا كل السعودين راسبين بلا أستثناء .
وفي هذا الترم أنا لاحظت نفس أسلوبه وسرت أدقق معاه , وجدت انه ماعنده شي اسمه 10 من 10 , يعني اعلى شي عندهتاخذه 7.5 من 10 , ولمن نسئله ليش ما أخذت الدرجه كامله , يرد بي استبلاه ماعندي طالب ياخذ ردجه كامله !!!
عموما" انا وطلاب الكلاس قدمنا عليه شكوى رسميه عند مديره المعهد , بعد فشل محاولاتنا بحل المشكله مع الهيد تيتشر , ألي قالت لي في احد الاجتماعات بكل : أنا (الهيد تيشتير ) و أيرك
أصحاب من 20 سنه ,
مدري أيش أفهم من الجمله السابقه , غير انه لاتوجع راسك شكوايك محا تغير شي

وبي اختصار الشكوى كانت أنه أيريك كان يضيع وقت الحصه في استبلاهات وكلام فاضي , طول الترم 3 شهور فقط على هبالات سبيكنج و وجع راس بغير فايده , , لكن مايعطيني ولا أي كتابه في الكلاس او أيس أي ولا أي شي . فقط أخر ترم واحد أيس اي ويكون عن طريق البحث و المصيبه الكبرى أنه الأاختبار النهائي بيكون كتابة أيس أي في اكلاس , طيب كيف تختبرونا في شي احنا ماأخذناه ولأ أدربنا عليه في كلاس !! فجتمع أغلب الطلاب وسوينا خطاب وسجلنا اسامينا عليه ورفعناه للمديره
وهذا خطاب الشكوى ألي حاب يطلع عليه
complaint letter.pdf - Speedy Share - upload your files here




والرد جا جدا" بارد من مديرة المعهد وهذا نص ردها ألي حاب يطلع عليه , شرحت أنه المفروض لازم يعطينا ألاشياء هذي :
Please note that your teacher is following the curriculum as it is written and that this is how writing is taught in our program. In your class, the teacher is going over the various parts of essay writing: topic sentence, introduction paragraph, main points and supporting arguments, and conclusion paragraph.

طيب هذي الأاشياء الأاساسيات أخذناها في ليفل 330 و 410 , وكنا في ليفل 410 نكتب على الاقل 4 أيس أيات على الأاقل طول الكورس ,
كيف ألان التيشتسير هذا مايعطينا شي !!

وبعد مناقشتي مع أحد التيشر السابقين , كبها في وجهي بكل صراحه , انه المدرسين القدامى هذول نفس ايرك وأنتينا و دون , هذوله سلطتهم أقوى من الأداراه نفسها وما أحد يقدر يقلهم شي, وبداية كل ترم هما يختارو الكورس والليفل الي بيدرسوه وما احد يراجع وراهم , وأساسا" هما صلاحيتهم في التدريس انتهت ,
حسيت المدرس هذا أساسا" حاقد عليهم هههههه , من رغم أنه قديم سرله 12 سنه تدريس , لكن هذوله على كلامه من أيام الديناصورات وهما يدرسو في المعهد
ـــ

ولو تعرف أحد في ليفل يو أي بي اخر ليفل , أسئلهم عن الصعوبه الي هما فيها , انا اعرف 3 سعودين , 2 ساحبين من الكورس و ثالث بس ممشي كذه حضور , والسبب أنه المواد جدا" جدا" جدا" صعبه , هنا يبداء الكرف الصح , وطول الاترام الي راحت كانت بس شربت مويه !! وهذا الشئ ألي انا ماأبغاه , الواحد جاي يدرس ويتعلم , مو أجلس طول ألاترام مريح ومكبر المخده وأجي أفحط في اليو أو بي و ولا اعديه , احد الشباب ماشالله ألي اعرفه شاطر ومجتهد , هذي ثالث مره يعيد اليو اي بي , يقلي الكورسات الي فاتت كلها كلام فاضي, فا المشكله الي حاب اوضحها انه في جاااب كبير بين الليفلات كلها واليو اي بي و وكمان المدرسين العنصرين هذول ما احد يقدر يكلمهم , وانا قلت لها للهيد تيشر انتو تخلو هذول المدرسين علشان يعيدو في الطلاب , ولا كلاس 14 طالب راسب من أصل 16 !! كيف تجي ذي .

عموما" الكلام كثير جدا" وأنا اختصرته , وفي اشياء أكثر من كذه لكن هذا حسب تجربتي لمعهد اليوفيك , وأنا قبل لا أخش المعهد أحد الي كانو موجودين فيه الله يذكر بالخير حذرني وقالي روح أي مكان ثاني أحسلك لو تدرس في الجلوبال فيلج , قلت له ماعليك ربنا يسهلها , وفعلا" اول ترم مشيت الأمور جدا" رائعه وكان يدرسني دونا وجين , والحمدالله أسست نفسي تمام , ألي بعدها كان مع جويس كيم , هذي في الكتابه جدا" ممتازه , بعده جينا عند الأاصلع أيريك , بديت الأانتكاسه .

مع العلم المعهد قام يساومني من رغم درجاتي عاليه , وهذي بعد ماقدمت الشكوى لهم شوف أيش مرسيليلي
رفعو درجتي الى 95٪ من كانت 85٪ فقط علشان ياطالب خلاص أسكت بننجحك الترم هذا , لكن أنا مو شايل هم نفسي , افكر في ألي يجو بعدي , وفي اخواني المسلمين , ليش أنتو يامعهد جامعة محترمه تخلو المدرسين العنصرين هذول يستمرو في التدريس

...

وشاكر لك أخ خالد مره أخرى على تعليقك , بس انا حبيت أوضح وجهة نظري وسبب ذكري لعدم النصح بمعهد جامعة فكتوريا نهائيا" , مع العلم فيه بعض زملائي بالمعهد متفقين مع رائيك انه ممتاز , لكن أعتقد لو جربو أحد المدرسين العنصرين هذول أو ليفل يو أي بي وخصوصا" مع دون , بيكون لهم كلام ثاني ,


والله يوفقنا ويفقك انشالله .

بالنسبه لمعهد فكتوريا انا استفت منه كثير في تقوية الكتابه والقرائه صحيح في بعض المدرسين العنصرين بس انا وش دخني فيهم
خلصت سنه كاملة بالمعهد و اموري تمام
الان انا سجيلت في دورة الايلتس في النجوا والحمد لله حصلت علي ٦ في الايلتس باقي لي نص وادخل جامعه
وبالنسبه للمعاهد انا انصح بمعهد الجامعه ولو ماتبي معهد الجامعه روح علي معهد النجوا عندهم برنامج الباث واي ممتاز والمدرسين تمام

واتفق مع الاخ اللي قال ان جلوبل فلج وجيوس معاهد فاشلة و يجب الابتعاد عنها

خاتمه
علي الطالب الاجتهاد بنفسه تري ٨٠٪ علي الطالب و ٢٠٪ علي المعهد