شرح طالع لبعثة؟ تعال هنا قبل لا تتورط !!!!

إلى كل اخواني وأخواتي المبتعثين السلام عليكم ورحمة الله وبركاته
اللهم علمنا ماينفعنا وانفعنا بما علمتنا وزدنا علمنا

جاي لبعثة؟
أول مرة تطلع من السعودية؟
لغتك الإنجليزية ضعيفة؟
خايف من المجتمع الغربي؟
ماتعرف وش الافضل بالطيران؟
ماتعرف تجيب قبول؟
ماتعرف تبحث عن سكن؟
متورط؟ او فيه ناس حسسوك انك متورط؟

كل الأشياء هذي مرينا فيها من زمان ومرينا بتجارب كثيرة. ماأبغى اطول بالموضوع وأمغّط السالفة ومثل ماقال المثل (خير الكلام ماقلّ ودلّ)
بقول بعض التجارب اللي مريت فيها وبعض النصائح اللي ان شاءالله تنفعكم
(الكلام اللي بقولة ما أقصد فيه أحد .. فقط تجربة مريت فيها)

(خلي عندك ورقة وحدد الاشياء اللي تبغاها )
- قبل السفر او قبل استلام اوراق الابتعاث، افتح النت وابحث عن الدولة اللي تبغاها (أول شي)
يمكن تحصل دولة او دولتين اعجبوك ( كويس كل مازاد عدد الدول .. علشان تقارن بالاخير بينهم)
- بعد ماتحدد الدولة او الدول، ابحث عن الطقس المناسب لك (معتدل/حار/ثلج)
- بعد ماتحدد الطقس، ابحث عن المدينة اللي يتوفر فيها الطقس المناسب لك
- بعد ماتحدد المدينة (واتوقع انك بتحصل اكثر من مدينة ) ابحث عن الجامعات اللي فيها التخصص المطلوب في المدينة هذي او في المدن اللي اخترتها
- بعد ماتحدد الجامعات، افتح مواقع الجامعات واقرا حتى لو ماتعرف (إعتمد على نفسك شوي) ترجم من قوقل، إسئل احد عن ترجمة كلمة او تخصص
- بعد ماتمر على مواقع الجامعات اللي اخترتها، تعال من بكرا وافتح المواقع مرة ثانيه بتحصل انك تفهم اكثر من امس (لانها صارت مألوفة لعقلك)
- روح واقرا عن الجامعات اللي اخترتها (مبتعث، ويكيبيديا، تويتر، اي منتدى، عربي/انجليزي) يتكلم عن الجامعة هذي علشان تعرف وش يقولون الطلاب عن الجامعة هذي
- افتح خرائط قوقل وشوف موقع الجامعة خذ فره حوالين الجامعة شوف (السكن بعيد او قريب/ هل السكن متوفر او لا / غالي السكن او لا ) اشياء زي كذا
- اذا مافهمت شي بموقع الجامعة، ممكن انك ترسل ايميل للجامعة تقول
ابغى قبول بالتخصص (......) واحب اعرف ايش المتطلبات المطلوبة والتاريخ ورابط التسجيل
خلي كلامك بسيط وسهل وواضح علشان تجيك الاجابه واضحه وبسيطه
- بعد ماتجيك الاجابات وتوضح عندك الرؤية بنسبة 40% (ممتاز جداً) لانك عرفت اشياء كثيره عن المدينة وعن الجامعة
بعد كذا صلي ركعتين واستخر ربك (مره ورمتين وعشر حتى ماتلقى القبول والراحة بقلبك) فالاستخارة من هدي النبي صلى الله عليه وسلم وصحبه، وكذلك المشورة، بأن يستخير الإنسان ويستشير أمر محمود ومطلوب
- إنتبه ثم إنتبه ثم إنتبه تعتمد على فرد يسوي لك كل شي (القبول / السكن / أي شي ثاني)
يمكن يقولك ايه سويتلك كل شي ولما تاصل مدينتك .. ماتلقى شي وتلقى الشخص هذا على قولتنا فص ملح وذاب !!
تبغى خدمات اطلبها من جهة مسؤوله او على الاقل معترف فيها واتوقع بكل مدينة فيها نادي سعودي فحاول تتواصل معهم أول شي واذا عندك اسئلة، إسئلهم قبل ماتتخذ أي اجراء تبغى تسويه
للمعلومية (افراد النادي السعودي بكل مدينة شباب متطوعيين زي الورد يبغون يخدمون ابناء بلدهم لوجه الله فقط بدون أي مبلغ مادي) ومااتوقع المتطوعيين بالنادي يقدرون يختفون او يلعبون على احد
- بعض الناس يحب يسوي النقاط اللي قلتها بالعكس يعني مثلاً (الطريقة غير مهمه .. المهم النتيجة)
- تبحث عن الجامعات اللي فيها التخصص المطلوب (بأي دولة كانت)
- نقول مثلاً لقيت خمس جامعات فيها التخصص هذا
- بعد ماتراسل الجامعات وتلقى الاجوبة اللي تبغاها وتراسل جهة موثوق فيها ورسمية ومعترف فيها (مثلاً النادي السعودي او شخص مُجرب وموثوق فيه)
من هنا تبدأ تقارن بالدولة والمدينة والطقس والمكان والاشياء اللي قلتها قبل
إسئل ولا تخاف .. الاسئلة ببلاش ترا

نقطة كثيرة مهمة (أعتمد على نفسك بالبحث .. أعتمد على نفسك بالبحث .. إعتمد على نفسك بالبحث) لا تعتمد على الغير حتى لو كنت ماتعرف انجليزي
ترجم من خلال النت .. اطلب ترجمة .. سوي أي شي علشان تعرف اللي انت تسويه
انا مابحثت ولا فتحت نت ولا قريت ولا سويت شي. كل اللي سويته رحت لمكتب قبولات بالرياض وعطيته فلوسه وجاب لي قبول وربي ماادري وين فيه، وتواصلت مع شخص بالنت وطلب مبلغ علشان حجز سكن واستخراج شريحة جوال وتأمين واتعاب ومدري ايش وحولتها له وبعدها اختفى ولما وصلت كندا صرت مثل الهوملس يومين، وبعدين طحت في وحده من جنسية عربية أكلت اللي قدامي واللي وراي ولعبت علي بعد بس صارت احسن من اخوي السعودي

( اعيد واكرر .. أنا مااقصد احد بشخصه ولا اقصد مدينة أو دولة.. هذي تجربتي .. والله من وراء القصد)

والله يوفقنا وإياكم لما يحبه ويرضاه .. وبالتوفيق للجميع