مشكورين أخواني وأخواتي على ترحيبكم, و ح أحاول أرد على أستفساراتكم حبه حبه لأنه مخي متربس شويه اليومين ذي عندي اسايمنت لاحس مخي بأسلمه بعد اسبوع تقريبا.
أختي مشتاقة لحلمي:
اسئلتكي من النوع اللي يتعبني نفسيا ومخيا لأنه بعد كل سؤال تكتبي "وكل شي"
, ههههههههههههه ترى أمزح معاكي أختي, أجاوبك على قد ما أقدر:
انا بداية أخترت هذا التخصص بالذات لأنه أكثر فرع من فروع النقوستكس حسيت أنه عملي و practical ومافيه تنظير بس بدون حاجه concrete تحسيها زي مثلا السنتاكس ولا الفونولوجي ولا اللي زيهم من الاشياء النظريه.
الكورس في جامعة ايسكس يتكلم عن العقل ومناطق معالجة اللغة في العقل وكيف نقدر نعرف كيف اللغة تتعالج في الدماغ عن طريقة دراسة الناس اللي عندهم صعوبات تحدث مثل الافيجا Aphasia بأنواعها المختلفة.
أكثر دراستنا يعرضوا لنا تجارب في السياكولنقوستكس على ناس عندهم صعوبات تحدث وناس طبيعين ونشوف ايش نقدر نستنبط من هذي الدراسات.
الدراسه مو كلها عن دراسة صعوبات التحدث, لكن برضو تتكلم عن التجارب اللي نقدر نسويها ونعرف من خلالها على سبيل المثال العرب اللي يتعلموا انجليزي هل يكتسبوا مثلا بعض القواعد مثل subject- verb agreement بشكل سهل ولا لأ وكيف يكون ادائهم مقارنة مثلا باللي لغتهم الاصليه الاسبانيه ويتعلمو الانجليزي (وهذي التجربة قاعد أسويها حاليا مع قروب معايا ومطلوب مننا نسلم نتايج هذي الدراسه هذا الترم بس طبعا دراسه مصغره يعني).
من ناحية المستقبل الوظيفي لهذا التخصص في بلدنا, ما أتوقع انه يفرق عن اي برانش من البرانشز حقت اللنقوستكس اذا كان يعني هدفك انك تعملي في المجال الاكاديمي في الجامعات السعودية, لكن اذا كنتي تدوري على مسار وظيفي خارج المجال الاكاديمي اتوقع انه مستقبله لا بأس به خصوصا مع مراكز صعوبات التحدث ومراكز صعوبات التعلم (ماني متأكد من هذي النقطه, أفضل انك تسألي عنها).
الدراسه بإسكس لابأس بها يعني, الدكاتره اللي يدرسوني حتى الان مره نايس ومتفهمين وكلاساتهم ممتعه, المشرف حق الكورس حقي بروفسور ألماني جدا لطيف ويدرسني مادتين هذا الترم ومسوي عزيمه في بيته هذا الويك اند عازم فيه الطلاب الجدد اللي في كورس السايكولنجوستكس وطلاب الدكتوراه في هذا المجال كمان.
أختي ليدي ماكبث, الله يجزاكي خير على دعواتك وان شاءالله ربي يحقق مرادنا أجمعين و يوفقنا في دراستنا ويبارك لنا فيها أجمعين اللهم آمين.
نعم هذا أسمي
.
أعتقد اني جاوبت على جزء من أسألتكي في ردي على الاخت مشتاقه, و ح أرد على بقية أستفساراتك:
الديبارتمنت حق اللغويات في جامعة ايسيكس حاصل على تصنيف عالي جدا في تقييم RAE اللي كان عام 2001, وهذا التصنيف يراجع كل 7 سنوات و ح يكون في تصنيف جديد ح يصدر في ديسيمبر من هذي السنه والله أعلم كيف ح يكون تصنيف القسم وقتها.
لكن اللي حسيته انا انه ديبارتمنت فعلا قوي ومتطلب. بس على الرغم من هذا الستاف حق الدبارتمنت لطيف ومتعاون وكذلك دكاترة القسم حبوبين وتحسي أنهم متقاربين من بعض. في دكتورة ألمانيه تدرس بعض مواد السايكولنقوستكس لكن ماتدرسني شي هذا السمستر,مره كنت اتكلم معاها تقول انها أشتغلت في اقسام كثير وفي جامعات مختلفه لكن قسم اللغويات في جامعه ايسكس تحس الاعضاء حقينه أكنهم عائله وحده ومتقاربين من بعض.
بالنسبة للدراسه هي لاهي اللي صعبه معقده ولا هي اللي سهله مره. يعني زي أي دراسة ماستر في الدنيا يبغالها جهد ومثابرة, لكن الدراسة نفسها مافيها شي معقد مره يعني, لو الواحد يسوي شغله أول بأول ويقرا للي مطلوب منه في وقتها ويحضر محاظراته ويتفاعل فيها ح يحصل الماستر أسهل من البكالوريوس بكثير, وأولا وأخيرا التوفيق من عند رب العالمين.
انا صراحة ما أشوف تخصصي صعب بالعكس أشوفه جدا ممتع وتقري فيه وانتي مستمتعه, انا اشوف انه التخصصات النظريه البحته في النقوستكس هي المعقده من وجهة نظري.
سامحوني طولت عليكم وان شاءالله أكون رديت على استفساراتكم بشكل وافي
